Nan yon arete yo fè sòti jodi lendi 3 jiyè a, Tribinal Federal peyi Lasuis deside voye jete byen lwen demand Federasyon Entènasyonal Foutbòl Asosiyasyon(FIFA) te fè nan lide pou te retire desizyon Tribinal Abitral Espò(TAS) te pran pou te blanchi Yves Jean-Bart la.
Aprè TAS te deside retire sanksyon ki te pran kont ansyen prezidan Federasyon Foutbòl Ayisyen an, FIFA li menm te deside mande pou tribinal federal peyi Lasuis anile desizyon pou te blanchi Yves Jean-Bart sou tout sanksyon ki te pran kont li yo.
“Aksyon an pa kenbe“, se sa responsab lajistis peyi Lasuis yo deside pwononse sou dosye sila pandan yo fè konnen FIFA ap gen pou peye 15 000 fran pou frè lajistis epi 17 000 fran pou dedomajman.
N ap raple ansyen prezidan Federasyon Foutbòl Ayisyen an, Yves Jean-Bart alyas “Dadou” te enplike nan dosye tizonnay sou tifi nan Foutbòl Ayisyen an, sa ki te fè yo kondane l pou l pa janm mele nan koze foutbòl. Poutan, daprè sa Tribinal Abitral Espò a te estime nan dat 12 fevriye 2023 a, yo te rive konkli pou di akòz pa gen ase prèv yo leve tout sanksyon yo.
Atik sa se pwopriyete prive ©️ Gwoup Medya MAGHAITI 2023
