Jounen jodi lendi 19 septanm 2022 a, divès vil nan peyi a leve anba gwo tansyon, kote se barikad ak fatra, dife epi katouch k ap tire nan prèske tout rakwen. Anplis, moun yo vle kontinye ak modòd revandikasyon yo.
Aprè premye minis defakto Aryel Henry te fin pale ayè dimanch lan, li ta sanble agase moun yo pi plis ak koze se gang ki ta nan lari a olye revandikasyon popilè. Plizyè vil ak zonn nan kapital la depi nan lannuit pa te pran tan pou yo te leve kanpe kont deklarasyon sa, tankou Pòdpè, Senmak, Jakmèl, Jeremi, Okap, Dèlma, Petyonvil, Nazon, Kanapevè, elatriye.
Nan vil Pòdpè anpil piyaj fèt, sitou nan espas òganizasyon ”Caritas’‘ la, kote popilasyon an pote anpil pwovizyon ale Lakay yo.
Nan Pòtoprens, espas estokaj gaz “Terminal Varreux” bloke, akoz yo gen gwo difikilte pou y al distribye gaz yo nan ponp yo, jan premye minis defakto Aryel Henry te anonse sa ayè dimanch lan nan adrès ak nasyon an.
Anplis, popilasyon an sou lòtbò pa li ap chante ”Bwa kale, bwa kale nan bouda Aryel Henry”, sous radyo Zénith.
Pandan, premye minis la pwomèt divès kalte bagay li pral fè ak lajan gaz la, tankou bay asistans sosyal, achte angrè ak semans, kreye restoran kominotè, elatriye. Sou lòtbò a, popilasyon an pa deside pran priyè epi kanpe dèyè barikad yo ak mande pou li kite tèt peyi a.
Atik sa se pwopriyete prive ©️ Gwoup Medya MAGHAITI 2022
