Aprè gwo dife ki te eklate nan mache kominal Gonayiv la nan lannwit 3 pou louvri 4 jen 2024 la, plis pase 200 machann lage 2 bwa pandye, si n kwè Roseline Limage, kòdonatris rasanbleman madan Sara (RAMSA) nan Latibonit.
Dife sa ki ravaje pati nò mache a nan ri Fabre Geffrard, lakoz plizyè machann fè defisi 25, 50 mil jiska 1 milyon goud. Depi jou sa, divès machann sa yo ki sitou abite nan zòn nan yon fason pou mete pwodwi yo pou vann, lage nan gwo tèt chaje, yon sitiyasyon Roseline konsidere tankou yon gwo dezolasyon ak tristès.
4 jou aprè dram sa rive nan vil Gonayiv, otorite konsène yo poko poze kenn aksyon, men sa pat anpeche Lameri pran non viktim yo, yon aksyon ki vle di yon premye pa pou reprezantan RAMSA a nan depatman Latibonit la.
Menm jan sa abitye fèt a chak fwa katastròf sa yo repete nan peyi a, ti machann yo pa sispann jwenn pwomès depi aprè dife a, daprè sa Roseline Limage fè konnen. Li ale pi lwen pou l di souvan fwa otorite yo nan peyi dAyiti pa souvan respekte pwomès yo fè ak yon seri machann. Li soulinye pou l di, li toujou ap resevwa plent machann. Atant yo pa janm rive konble nan depatman an.
Michelove G.Bazelais
Atik sa se pwopriyete prive ©️ Gwoup Medya MAGHAITI 2024
