Byen bonè jodi madi 9 me a, ouvriye nan SONAPI yo te pran lari pou kontinye manifeste, kote yo denonse lapolis ki itilize vyolans pou anpeche yo egzije responsab yo satisfè revandikasyon yo. Si n kwè pawòl sitwayen sa yo, se sistèm peze souse a yo ta vle ki pou chanje paske yo estime lavi a twò chè pou yo.
Menm jan yo te fè kwè y ap pase 3 jou ap manifeste a, ouvriye yo te tanmen jodi madi a 2yèm jounen manifestasyon yo san vyolans. Poutan, lapolis nan bò pa l te itilize gaz lakrimojèn pou anpeche pwotestatè yo fini pakou a, yon aksyon pwotestatè yo denonse paske yo estime se dwa yo ki pèmèt yo ka ap manifeste pou yon lavi miyò.
“Nou vle goumen pou lavi nou chanje yo paka chita ap voye gaz sou nou chak fwa nou rive devan ONA e nou pa fè anyen, sa revòltan“, se pawòl sa yo youn nan manifestan yo te deklare pandan l lonje dwèt sou lapolis ki pa ta dwe ap maltrete yo pou sa.
“Nou pa gen wòch, ni anyen nan men nou, n ap manifeste pasifikman men yo jis deside gaye gaz nan mitan nou, sa se mechanste l rele“, toujou daprè deklarasyon yo.
Paralèlman, malgre ensidan sa te vinn pase pi douvan, pandan tout pakou yo sòti douvan pòt pak la pou rive devan ONA, yo pa t sispann reklame 2500 goud kòm salè minimòm, epi kriye aba kont koripsyon nan bwat leta yo.
Atik sa se pwopriyete prive ©️ Gwoup Medya MAGHAITI 2023
