Nan yon atik Jounal Ameriken «Miami Herald» pibliye jounen jodi vandredi 5 me 2023 a, li fè konnen Bocchit Edmond jwenn revokasyon l nan anbasad Ayiti nan Washington akoz eskandal ki fè kwè li nan koripsyon.
«Selon ankèt ki mennen ant gouvènman ameriken ak ayisyen yo jwenn pèsonèl anndan anbasad la te plede fè paspò pou Ayisyen k ap viv andeyò Etazini pou lajan» selon sa Jounal Miami Herald ekri.
Anbasadè Bocchit Edmond ki te nome nan lane 2020 sou direksyon ansyen prezidan Jovenel Moïse, ta pral revoke nan dat 3 me ki sot pase la, selon Minis afè etranje Victor Généus.
Louis Harold Joseph, anbasadè Ayisyen nan Bayamas, ki te fè yon ti tan byen kout kòm anbasadè nan Washington, se non k ap site pou vin okipe pòs Bocchit Edmond la.
Paralèlman, Bocchit Edmond te pral soti yon nòt ayè jedi 4 me a pou li voye jete byen lwen akizasyon k ap kouri sou do li ak menm pwente dwèt sou ansyen minis afè etranjè Claude Joseph epi kouzen li Gelorme Juste ki ta òganize konplo sa kont li.
«Gen yon ankèt ki te mennen nan mwa Dawout 2021, ki te konfime Betina Edmond, ki se sè Bocchit Edmond gen aksè pou fabrike paspò san limit chak semenn, sitou jou jedi pou rive dimanch. Poutan, li pa te menm anplwaye nan gouvènman an», toujou selon jounal ameriken an.
«Sa pou nou konnen si Etazini dekouvri vrèman nan aksyon li yo li te konn fabrike anpil paspò pou ofri ak kèk moun ki kapab nui Etazini, nou kapab menm rete konsa nou wè yo mande pou yo voye l Etazini nan objektif pou li jije devan yon Tribinal ameriken», selon sa anbasadè Louis Harold Joseph te ajoute sou koze sa.
Nan mwa jen 2021, ladwann Ameriken te sezi plizyè koli ki te gen ladan yo 400 Paspò Ayisyen epi 50 000 dola ameriken, ki te dirèkteman avèk kouzen ansyen minis Claude Joseph, ki te chèf seksyon konsilè Dayiti nan anbasad Ayiti nan Washington.
Peyi Etazini fè konnen
«Konpòtman Bocchit Edmond reprezante yon menas pou Sekirite peyi a», selon menm sous la.
Credit Photo: The Haitian Times
Atik sa se pwopriyete prive ©️ Gwoup Medya MAGHAITI 2023
