Jodi lendi premye me 2023 a komite Miss Univers la pataje lis peyi k ap ka patisipe nan 72yèm edisyon konkou Miss Univers la. Pami lis peyi ki konn gen aksè pou patisipe yo, responsab yo deside pa mete Ayiti, san yo pa presize rezon ki fè sa.
Miss Univers se yon konkou bote pou fanm ki fonde depi 1952. Premye fwa Ayiti patisipe nan konkou sila a se te an 1962. Men pou yon rezon responsab yo pa mansyone, yo deside pa bay Miss Haïti franchiz, kise òganizasyon ki te konn pèmèt Haïti patisipe nan konkou Miss Univers.
Pandanstan, n ap raple sa genyen 2 mwa kote plizyè amsyen Miss ayisyèn te patisipe nan yon emisyon ki rele “Esans” kote yo t ap denonse anpil abi yo te konn sibi anba Òganizasyon Miss Haïti a. Pami moun sa yo genyen Suzana Sampeur ki te eli Miss World Haïti 2016 ki te fè konnen responsab yo te mete majorite depans yo sou do l san yo pat menm avèti li de sa yo.
MagHaïti te eseye kontakte òganizasyon Miss Haïti a ki konn genyen franchiz ki pèmèt yon fi ka al reprezante peyi a nan konkou Miss Univers. Malgre plizyè tantativ nou pa jwenn okenn repons konsènan rezon ki ta lakoz Haïti pap ka patisipe nan konou Miss Univers la.
N ap raple an 2022, se Mideline Phêlizor ki te reprezante peyi Dayiti nan 71yèm edisyon Miss Univers la. Demwazèl la ki fèt nan lane 1995 lan te fini nan Top 16 la.
Atik sa se pwopriyete prive ©️ Gwoup Medya MAGHAITI 2023
