Nan yon atak nèg ak zam fè nan lokalite Meyòt nan Petyonvil nan lannuit mèkredi 5 avril 2023 a, yo rive mete dife nan sou komisarya a. Aksyon sila ta pase pandan pa gen okenn enfòmasyon disponib pou ta konnen si te gen polisye nan espas la nan moman dife a.
Alòske prezime bandi pa sispann met kontwòl sou plizyè zòn nan Petyonvil la, konsa tou yo pa janm rate okazyon pou defye lapolis nasyonal la. Se nan sans sa, ayè ankò yo rive mete dife nan espas sou komisarya Meyòt la. Nan kèk videyo k ap sikile sou rezo sosyo yo nou ka wè kòman espas la t ap pase anba flanm dife.
Pandantan sa plizyè medya lokal rapòte nan moman zak sila, te gen anpil tire, sa ki te mete kè sote nan mitan abitan zòn Pegivil, Jirado ak lòt toujou. Pou kounya poko gen okenn bilan ki fèt pou tabli nan ki nivo dega yo ye.
N ap raple se pa premye fwa nèg ak zam mete dife oubyen kraze yon komisarya nan peyi a san jwenn okenn repons nan men otorite polisyè yo ki plase pou sa. Komisarya Lotin nan Fòjak, ak komisarya Pènye se kèk nan sa yo fè dega ladan yo deja pou lane 2023 sila.
Atik sa se pwopriyete prive ©️ Gwoup Medya MAGHAITI 2023
