Rodolphe Jaar plede koupab jounen jodi vandredi 24 mas 2023 a, akoz li te founi lajan ak materyèl pou yo te touye ansyen prezidan Jovenel Moïse nan lannuit 6 pou rive 7 Jiyè 2021. Anplis, li avwe li te peye sekirite lakay ansyen prezidan an pou yo pa entèvni nan moman aksyon an.
Nan yon dokiman ki siyen sou asasina avèk pwokirè Etazini an, Andrea GOLDBARG, Rodolphe Jaar epi avoka li, akize finalman aksepte li te patisipe nan zak kriminèl sa. «Wi mwen koupab.»
Li ajoute pou li di «Mwen te founi materyèl ak lòt resous, an patikilyèman mwen menm ki te depanse lajan sa epi peye sèvis pou yo te kidnape li epi touye prezidan Jovenel Moïse aprè li fin konplote avèk anpil lòt moun nan Florid epi mèsenè Kolonbi, kidonk Jaar ak 10 lòt moun, ki se veritab sispèk nan krim sa» selon jounal Miami Herard.
Jounal la te kontinye pou li ajoute «alòske lanmò prezidan Jovenel Moïse nan kapital Pòtoprens lan, majorite planifikasyon ak finansman epi konplo ki te vize ranvèse prezidan an te planifye nan peyi Etazini, sitou nan Sid Florid apati kòmansman 2021» selon pwokirè Ameriken Markenzy Lapointe nan moman konferans pou laprès mitan Fevriye.
«Rodolphe Jaar pa sèlman te bay lajan, men li te bay manje, kote pou moun yo rete epi li te kowonpi plizyè lòt fonksyonè ki te responsab sekirite Jovenel Moïse pou te penmèt mèsenè yo gen aksè avèk kay la », nan sa Monica Castro revele.
Nan lannuit 6 Jiyè 2021, Rodolphe Jaar te pami lis moun sa yo : James Solages, John Joël Joseph, Germany Rivera epi Mariano Antonio Palacios. Kote moun sa yo t ap planifye pou al asasinen prezidan an lakay li. Yon zak kriminèl ki te byen kalkile ak byen defini avèk plizyè aktè ekonomik epi politik nan peyi an.
N ap raple Rodolphe Jaar ki gen 50 an te patisipe nan yon ankèt Ameriken t ap mennen sou kèk kontrebandye ak dilè dwòg, sak te pral evite li pran yon prizon pou lavi.
Atik sa se pwopriyete prive ©️ Gwoup Medya MAGHAITI 2023
