Lapolis mete men sou Saint Eloi Gutler nan zòn Pako, yon prezime enfòmatè gang, ki ta fè tèt li pase pou chany. Daprè lapolis sitwayen sa itilize tit sa pou pèmèt zak kidnapin fèt pi byen.
Selon sa kòdinasyon près lapolis la (CPRP) fè konnen, enstitisyon polisyè a t ap pousuiv sitwayen an bon lontan, avan yo te rive mete men sou li lendi 27 fevriye pase a, nan zòn Pako, Petyonvil.
Nan bò pa endividi a, li deklare gen plizyè chèf prezime bandi ki konn ofri l lajan vre, men daprè sa l fè konprann se pa nan objektif pou l fè toutè pou yo, men se pou yo ta antre nan relasyon seksyèl gason ak gason ak li.
Toujou nan kad dosye sila, Lapolis te rive jwenn 318 dola vèt, ak 2 000 goud sou Saint Eloi. Yon kantite lajan pyès moun pa rive jwenn bon vèsyon sitwayen an, ki li menm pa rive bay kijan l fè te gen lajan sa sou li.
Nan eksplikasyon l te bay yo, li ta pral defann tèt li, pou di se lajan sòl li, alòske nan yon premye tan li te deklare se kòb moun konn fè li kado nan lari a (akòz li te konn ap mande), mete sou sa l te konn vann kachnen, plis lajan ameriken li konn achete nan men yon zanmi l, daprè sa l fè kwè.
Atik sa se pwopriyete prive ©️ Gwoup Medya MAGHAITI 2023
