Selon sa minis afè etranjè Trinidad la, Amery Browne fè konnen ayè dimanch 26 fevriye 2023 a, yon gwoup dirijan nan CARICOM lan ta dwe vinn chita pale ak gouvènman ayisyen an jodi lendi a. Daprè sa responsab la te di, reyinyon sa ap gen pou pale sou sitiyasyon kriz peyi a.
Daprè detay ki bay sou chita pale sa ki pral fèt nan otèl Montana jodi lendi 27 fevriye a, delegasyon sa ap gen pou panche sou kriz peyi a ap fè fas kare depi bon lontan an. Reyinyon sa pral fèt ak premye minis Ariel Henry, 3 manm Wo Konsèy tranzisyon an (HCT), kèk moun ki reprezante sektè prive a, sila yo nan sosyete sivil la, ak aktè politik yo.
Delegasyon sila ap gen nan tèt li premye minis jamayiken an, Andrew Holness, bò kote l ap gen minis afè etranjè jamayik la, Kamina J. Smith, yon reprezantan Kanadyen ak lòt gwo responsab nan kominote peyi Karayib yo(CARICOM).
Yon lòtbò, diplomat trinidadyen an fè kwè desizyon pou vin debat pwoblèm peyi Dayiti a, se yon desizyon ki te pran nan 44èm somè peyi CARICOM yo te tanmen semèn ki sot pase yo.
Atik sa se pwopriyete prive ©️ Gwoup Medya MAGHAITI 2023
