Lapolis anonse ayè jedi 23 fevriye 2023 a nan sware, direktè depatmantal latibonit la(DDA), Roger Goodson Jeune ak plizyè ajan Inite Depatmantal Mentyen Lòd(UDMO) pran kontwòl komisarya Lestè a. Anons sa vini yon jou aprè polisye ki te sou plas yo te deside fèmen pòt komisarya a.
Enstitisyon polisyè a fè konnen nouvo direktè DDA a ak plizyè ajan UDMO te rive tabli baz yo nan komisarya a depi byen bonè nan maten jedi 23 fevriye a. Men pa gen okenn detay ki rive bay, pou ta fè konprann si komisarya a ap fonksyonèl avèk ajan ki disponib epi dispoze pou sèvi popilasyon an fas ak prezime bandi.
Yon lòt bò, pou asire sekirite espas komisarya a ak tout popilasyon komin Lestè a, DDA a rive mete yon machin blende pou fè pòs nan komin lan, daprè sa lapolis di.
Nan menm sans sa, responsab yo deklare gen dispozisyon k ap pran pou anpeche move aksyon gang “kokorat san ras” nan lokalite a.
N ap raple polisye ki te afekte nan komisarya a, ki te anviwon 6 grenn daprè majistra zòn lan, Mutal Lozin, te deside fèmen espas la akòz problèm efektif ak problèm ranfò yo pa t ka jwenn pandan prezime bandi te deside anvayi zòn lan mèkredi pase a.
Atik sa se pwopriyete prive ©️ Gwoup Medya MAGHAITI 2023
