Sou radyo Magik 9, pwofesè Jean Antoine Mathias Loreus te fè yon bat bouch sou kijan gang rive kale nan depatman Latibonit jounen jedi 16 Fevriye 2023 a. Puiske, depi prèske bon tan fenomèn ensekirite ap vale teren, se nan kat kwen peyi an bandi ak zam ap okipe espas epi simen latwoublay nan popilasyon an.
Pou pwofesè Jean Antoine Mathias Loreus nan apwòch li «Latibonit se yon depatman ki te gen anpil konfli tè depi sou ansyen prezidan René Preval, diferan kominote youn te kanpe anfas lòt. Gen politisyen ki vin antre ladan li epi vin gen yon konfli sanglan.»
Anpil politisyen ki pase nan tèt leta Ayisyen an pa sispann jwenn kritik nan simen zam nan komin sa olye yo bay jèn fanm ak gason mwayen pou plante diri pou vin vann peyi an, men pito itilize yo pou pran pouvwa yo. «Kèk kandida te mete zam nan men moun ki avèk yo epi itilize yo pou yo kapab genyen eleksyon. Kit li genyen li kit li pèdi l, li paka reprann zam sa yo nan men yo. Menm jan ansyen chèf gang Odma te di se ansyen depite Profane Victor ki te mete zam nan men li», seklarasyon pwofesè Jean Antoine Mathias Loreus.
Latibonit pa sèlman kote k ap fè diri, men li vin tounen yon kote ki gen plizyè rezo gang k ap teworize popilasyon an, tankou gang Savyen, Baz Gran Grif, Ti Sourit, Jan Deni, elatriye.
Pwofesè Jean Antoine Mathias Loreus te kontinye pou li ajoute : «Bandi yo chèche gen kontwòl anwo plato santral ak ba plato santral jis pou yo ka gen kontwòl machin k ap sòti Sendomeng yo pou yo achte bal ak gen plis aksè.»
Pandanstan, n ap raple asasina 7 polisye nan Lyankou, kote nèg avèk zam te atake Komisarya Gonayiv la, sak te pral lakoz plizyè woulman nan tèt Lapolis la aprè plizyè sitin ak manifestasyon polisye yo.
Pwofesè Jean Antoine Mathias Loreus te pwopoze 2 solisyon pou rezoud kesyon gang nan depatman Latibonit la : «Angajman sitwayen, mobilizatè kominote tout fwa li byen ankadre epi rann gang yo pi fèb pou n ka reyalize eleksyon pou moun ka gen lejitimite nan tèt peyi a.»
Atik sa se pwopriyete prive ©️ Gwoup Medya MAGHAITI 2023
