Asistan sekretè deta nan biwo entènasyonal pou zafè lit kont estipefyan ak aplikasyon lalwa Etazini an, Todd Robinson fè jounal Miami Herald konnen ayè mèkredi 8 fevriye 2023 a, gen nouvo cha blende ki ta dwe rive Ayiti nan semèn k ap vini yo.
Nan kad yon verifikasyon sou kèk ekipman peyi Etazini te livre nan baz inite SWAT (Special Weapons and Tactics), anbasadè Todd Robinson fè konnen gouvènman Biden lan ap kontinye ede lapolis la. Konsa, li te tou profite anonse tou gen kèk machin blende ki gen pou rive nan peyi a.
“Nou gen machin blende k ap vini. N ap fè sa k depann pou n livre plis cha blende pandan jou k ap vini yo”, se deklarasyon li fè jounal ameriken an san bay plis presizyon sou dosye a.
Pandan tan sa, malgre li fè anons pou nouvo ekipman sa yo ki ta dwe ranfòse polisye yo nan bayay ak gang nan peyi a, responsab ameriken an rekonèt sa pap sifi pou pèmèt enstitisyon polisyè ayisyen an tabli sekirite nan peyi a. Men tou, li fè konnen peyi l la deja fè tout sa yo ka fè, pou rive jwenn bon rezilta jan tout moun swete l la.
Nan menm sans sa, nan zafè fòmasyon yo bay ak ekipman tankou, jile ki ka rete bal, kas, nouvo cha blende ak lòt ankò, yon pòt pawòl depatman deta ameriken an te rive deklare se 92 milyon dola vèt Etazini deja depanse pou ede polis ayisyen an.
Atik sa se pwopriyete prive ©️ Gwoup Medya MAGHAITI 2023
