Nan yon korespondans ki te gen dat mèkredi 23 novanm 2022, direktris depatmantal ministè anviwonman nan
nòdès Wideline Pierre, remèt demisyon l bay minis anviwonman an James Cadet. Dezisyon ansyen responsab la pran, se nan lide pou l pote amelyorasyon nan sosyete a, daprè sa li ekri.
«Se pou sa, mwen swete kite fonksyon direktris depatmantal ministè anviwonman akoz nouvo angajman sitwayen nan lit sosyal ak politik ki ta dwe mennen amelyorasyon sosyete nou an», daprè sa ki ekri nan korespondans ansyen responsab la.
Nan yon bò, pou afime pozisyon l kont otorite ayisyen yo ki deside relouvri pòtay fwontyè ki separe Ayiti ak Repiblik Dominikèn lan, Wideline Pierre deside kite plas li nan leta a, pou l ka batay pou pi bon kondisyon tretman pou migran ayisyen san papye yo lòtbò fwontyè a.
Nan yon lòtbò, Direktris depatmantal la eksprime l klèman kont otorite dominiken yo, ki selon li menm pran dekrè ki kontrè ak sa konvansyon peyi vwazen an genyen depi kèk lane. “L ap vyole konvansyon yo nan ti magouy pandan y ap kreye dekrè ki kont pwòp konvansyon pa yo. Nou vle di Abinader dekrè sa yo se dekrè chanpwèl, se dekrè kriminèl, nou menm Ayisyen nou p ap aksepte fòm depòtasyon sa yo”, se sa li te deklare nan yon konferans pou laprès, li te kontinye pou di tou, li pa gen pwoblèm ak depòtasyon yo, men se fòm sa otorite dominiken yo deside aplike a ki tout pwoblèm pou li.
Wideline di li menm li revòlte nan fason li wè ajan migrasyon dominiken yo ap depòte Ayisyen yo pandan 6 jou li te pase sou pon an. «Konpatriyòt nou yo vini pye atè, san mayo, ti bebe ap vini san paran, paran ap vini ti bebe ret nan kay. Mwen menm mwen revòlte, mwen endinye, mwen ofiske, epi mwen deside sòti nan endiyasyon pou m pase a laksyon. Santiman patriyotik mw pifò pase sèvis mwen t ap bay nan leta a», toujou daprè sa li te deklare.
N ap raple moun nan sosyete sivil nan Wanament la te deside fèmen pòtay fwontyè ak peyi Repiblik Dominiken lendi ki te 20 novanm pase a, pou pwoteste kont gouvènman Luis Abinader la ki pa sispann depòte Ayisyen nan move fason.
Poutan daprè kèk imaj k ap sikile sou rezo sosyal yo, pòtay la relouvri, daprè sa manm sosyete sivil la fè konnen se ta kèk moun nan gouvènman an ak kèk gwo antreprenè ki dèyè zak Sila a.
Atik sa se pwopriyete prive ©️ Gwoup Medya MAGHAITI 2022
