Jounen jodi lendi 7 novanm 2022 a, kontrèman ak inisyativ ki te pran pou te relouvri lekòl la nan peyi a, ta sanble se sèlman nan vil Senmak ak Lagonav dezisyon sa yo ta rive respekte daprè deklarasyon korespondan respektif radyo Mega nan vil sa yo. Pou Pòtoprens ak plizyè lòt vil pwovens, okenn pòt lekòl poko louvri pou ofri timoun yo moso levasyon.
Jan sa te anonse pandan kèk jou, gen anpil inisyativ ki te pran pou te relouvri lekòl yo. Nan sans sa, kowòdonatè estrikti politik Eskwad, Paul Gerot Jean- Baptiste te deklare lekòl yo ta sipoze louvri definitivman nan vil Senmak ak nan depatman Nip, paske yo rezoud tout pwoblèm yo. Responsab la asire yo te rive antann yo ak tout sektè yo pou relouvri pòt lekòl yo, tankou, asosiyasyon paran yo, pwofesè yo epi direktè lekòl yo.
Nan Pòtoprens, daprè yon sous nou ka fè konfyans plizyè lekòl deja ap fè preparasyon pou ouvèti lekòl la, konsa tou genyen ki deja lanse platfòm pou kòmanse kou yo anliy, tankou sa te konn ye lè lekòl te fèmen pandan peryòd lòk, sou administrasyon Jovenel Moïse la.
Depi aprè deklarasyon Minis Edikasyon Nasyonal ak fòmasyon pwofesyonèl, Nesmy Manigat pou anonse ouvèti lekol tipa, tipa nan dat 5 Oktòb 2022, anpil paran, elèv, profesè epi direktè lekòl te manifeste nan tout rakwen nan peyi a, paske daprè yo deklarasyon sa pa te gen plas li epi li te mete plis luil sou dife a, aprè desizyon monte pri gaz premye minis Ariel Henry te pran an. Plizyè manifestan t ap fawouche otorite pa bò isit, sitou sou koze lekòl la.
Poutan nan yon nòt lapolis Nasyonal Dayiti an te fè sòti, yo te fè kwè yo reprann kontwòl tèminal vare a, puiske li ta konsidere kòm veritab eleman ki lakoz blokaj peyi a pandan dènyè tan sa yo epi anpeche lekòl la relouvri pòt li.
Anpil paran ak pwofesè pa sispann eksprime fristrasyon ak kòlè yo kont lekòl la ki fèmen depi plis pase 2 mwa, pèsonn pa konn kilè l ap relouvri tout bon ak kilè timoun pral ka resevwa moso levasyon pou yon pi bon sosyete demen.
N ap fè n konnen gen plizyè vil pwovens sitiyasyon an pa ta parèt fasil ditou pou yo ta relouvri lekòl la, tankou nan vil Tigwav, Ti Rivyè Latibonit, Gonayiv, Ench, Okap elatriye. Mete sou sa, manm Pati Pitit Desalin lan, Moïse Jean Charles, deja anonse yon pwochenn mobilizasyon nan zonn Nò a.
Atik sa se pwopriyete prive ©️ Gwoup Medya MAGHAITI 2022
