Nan reyinyon Konsèy Sekirite Òganizasyon Nasyonzini an (ONU) te tanmen jounen jodi vandredi 21 oktòb 2022 a, yo rive vote pou mete sanksyon kont tout gang ki nan peyi a, an patikilye Jimmy Chérizier chèf gang G9 an fanmi e alye.
Konsèy Sekirite Òganizasyon Nasyonzini an mete ansanm fwa sa pou vote yon pati nan rezolisyon peyi Etazini ak Meksik te prezante devan konsèy lan. Nan sans sa, yo deside anpeche zam sikile nan men gang yo, yo mete entèdiksyon pou yo ale nan lòt peyi epi yo bloke lajan yo genyen, daprè sa ki ekri nan rezolisyon 2653 a.
Anbasadris peyi Etazini nan loni Linda Thomas-Greenfield pa te neglije pou mete an gad tout gang ki pa vle bay peyi a lapè : « Nou voye yon mesaj klè bay moun ki kenbe peyi a nan gòj .» se sa reprezantan Ameriken an deklare aprè sanksyon yo te fin vote kont gang yo, pandan reyinyon manm Òganizasyon Nasyonzini an.
Pandan tout reyinyon sila a, Anbasadris lan te plis limen pwojektè l sou Jimmy Chérizier alyas “Babekyou“, ki se chèf gang G9 an fanmi e alye. daprè li menm “Babekyou se youn nan responsab ki fè peyi a gen gwo kriz gaz ak kriz imanitè sa a, depi plis pase yon mwa“. Yon lòtbò reprezantan pèmanan peyi Dayiti nan Loni, Antonio Rodrigue di “sanksyon yo pou kont pa yo paka retire vyolans k ap ravaje peyi a, ki lakoz gwo soufrans bò kote popilasyon an, an patikilye fanm yo ak timoun yo” daprè deklarasyon li te fè.
N ap raple nan rezolisyon sila a pa te sèlman gen sanksyon ki prevwa kont gang yo, men li te gen ladan l tou posibilite pou fòs militè etranjè antre nan peyi a, dosye ki poko janm jwenn vòt peyi Lachin ak Larisi.
Atik sa se pwopriyete prive ©️ Gwoup Medya MAGHAITI 2022
