Yè dimanch 14 dawout 2022, te fè yon lane depi Okay, Jeremi, ak kèk lòt zòn nan Gran Sid la te frape anba yon tranbleman tè avèk yon echèl 7.2, sa ki te lakoz plizyè moun mouri ak plizyè lòt blese epi pèdi byen ak kay yo, presizeman majistra Jean Gabriel Fortuné ki te pèdi lavi li.
Gwo tranbleman tè nan Okay ak Jeremi epi lòt ankò te montre nivo solidarite pèp Ayisyen an pou ede moun yo rekanpe fas ak katastwòf sa, sitou nan voye èd ak pote kole sou plizyè fòm.
Yon lane aprè sitiyasyon lavi Moun sa yo vin pi difisil, akoz absans leta epi prezans plizyè gwoup bandi nan antre wout Sid la, sa ki gen gwo retonbe sou lavi sosyal ak ekonomik moun yo.
Premye minis defakto Ariel Henry, lokatè primati an pa te rete sou silans li aprè yon lane depi tranbleman tè te pase nan Okay ak Jeremi, elatriye. Premye minis Ariel Henry, te ekri sou kont Twitè li : ” Mwen envite tout konpatriyòt mwen yo nan jou sa yon refleksyon nan memwa ak souvni tòti epi makab”.
Premye minis defakto Ariel Henry te kontinye pou li ajoute “mwen ankouraje tout moun ak reflechi epi solidarite. Anplis, pou yo kontinye manifeste menm viv ansanm fas avèk doulè epi prèv sa k ap boulvèse frè n ak sè nou yo, sitou nan Sid la”.
Lokatè Primati an te tou pwofite raple gouvènman li an ap elabore yon plan relèvman ak rekonstriksyon pou Gran Sid la k ap reponn ak nòm ibanizasyon epi amenajman teritwa ki kadre avèk objektif Devlopman dirab nan pwojè 2030 lan.
Selon Brian Nichols, sekretè deta adjwen Ameriken te prononse li sou yon lane katastwòf sa (14 Dawout) :” Panse m yo ale dwat sou Ayiti nan okazyon yon lane trajik tranbleman tè sa, Etazini ap toujou rete yon patnè ki p ap janm lache pèp Ayisyen nan moman difisil li yo”.
N ap raple 4 Septanm 2021, Pwoteksyon Sivil te revele nan rapò li dènyè bilan detaye sou tranbleman tè avèk manitid 7.2 nan gran Sid la nan dat 14 Dawout 2021, presizeman 2248 moun mouri, 12 763 moun blese, 329 moun disparèt, 53815 kay kraze epi 83770 andomaje.
Atik sa se pwopriyete prive ©️ Gwoup Medya MAGHAITI 2022
