Samir Handal te arete nan peyi Latiki pandan li t ap fè eskal nan Istanboul nan dat 15 novanm 2021. Kabinè avoka Greenberg Trautig ki gen biwo li nan Washington ak Miami te anonse yè Vandredi 5 Dawout 2022 a, li fè peyi Latiki lage Samir Handal epi voye l tounen nan peyi Etazini.
Samir Handal pa janm sispann demanti akizasyon ki ta vle fè kwè li se youn nan konplis nan asasina Prezidan Jovenel Moïse nan dat 7 Jiyè 2022, selon VOA.
Selon Pulecio-Boek, youn nan manm Biwo kabinè Avoka binisman Ayisyen ak ajan Imobilye a te deklare nan Washington : ” Nou kontan eta dedwa te prezide pou li deklare Samir Handal inosan parapò ak akizasyon sa yo, li paka tonbe anba grif lajistis Ayisyen”.
Li te ajoute toujou :” N ap chèche kounya soulajman kont pati ki te chèche enplike Samir Handal nan gwo krim sa”.
Peyi Latiki te arete Samir Handal sou demann ansyen premye minis ak minis afè etranjè Claude Joseph, nan moman Avyon li t ap fè eskal nan Istanboul nan wout pou li t al Palestin. Li te pran Avyon nan Miami 15 Novanm 2021, daprè nòt pou laprès kabinè Avoka li te voye bay VOA kreyòl.
Yo di Samir Handal di : ” Li te konprann li te lib pou l vwayaje entènasyonal. Pandanstan, akoz entèpòl te mete yon alèt wouj dèyè li parapò ak manda li te genyen dèyè li nan polis Nasyonal Dayiti, kidonk ajan Latiki te oblije arete li”.
Greenberg Traurig te mande ak Entèpòl tou pou l sispann alèt wouj pou Samir Handal, annatandan yo pran desizyon final sou anilasyon li. Avoka yo pote plent kont Ayiti tou devan komisyon dwa moun entè Ameriken.
Greenberg Traurig se yon kabinè ki gen plis pase 600 Avoka k ap travay nan Etazini, kabinè sa te voye ekip li nan peyi Latiki pou al pote prèv pou anpeche yo ekstrade Samir Handal nan peyi Dayiti epi mande entèpòl anile alèt wouj la.
5 Jiyè 2022, Avoka yo te konvenk Jij Latiki pou l pa ekstrade Handal an Ayiti. Akoz sa, Samir Handal te jwenn asirans pou li te ka vwayaje an Sekirite nan peyi Etazini.
Atik sa se pwopriyete prive ©️ Gwoup Medya MAGHAITI 2022
