Aprè prezime bandi gang 5 segond ak bwa dwat Izo ki se ” Saint-Jacques alyas zo pwason” te rive egzekite nan depatman Nip, presizeman Ansavo nan yon lokalite ki rele Kokoye Dichenn, nan dat madi 31 me 2022, yon zak ki te filme, pandan li t ap reponn plizyè kesyon lapolis jiskake yo te finalman mande l pou li te di dènyè pawòl li avan li te rann dènyè souf li, se konsa li te pral di :
” Mwen ka di m nan men lapolis”.
Paralèlman, plizyè enstitisyon kou Fondasyon Je Klere ta pral reyaji parapò ak zak kriminèl sa epi kondane Egzekisyon ekstrajidisyè a, kote komisè Nip lan komèt.
Fondasyon an menm mande demisyon ak pousuit komisè gouvènman an epi egzije dedomajman fanmi viktim lan”, nan yon nòt li adrese ak minis jistis la ki se “Bertho Dorcé”, nan dat vandredi 3 jen 2022.
Pandanstan, Komisè Muscadin ta pral reyaji sou radyo “frag Max” pou li di :
” Nou la n ap batay jou ak lannuit, sitou ak sila ki sòti Matisan ak Gran ravin ki te konn ap teworize popilasyon an, kidonk Nip la ap tounen simityè pou yo”.
li te kontinye pou li ajoute : ” Yo kòmanse mouri, se pa jodia y ap mouri, popilasyon an resi wè videyo sa epi m pa vle nou panse se yon erè ki fèt, se pou bandi yo konnen gen moun toujou. Anplis, se pa sèl yo ki pou fè moun ap kriye, li te voye repons ban m epi m reponn li”.
Komisè gouvènman an detèmine pou li batay kont tout malfra nan depatman li an. Kote li vle retabli lapè ak lòd.
Diplis, nou raple gwo kokennchenn deklarasyon li te fè sou depatman Lwès la atravè yon videyo ki t ap sikile sou rezo sosyal yo epi menm di li ka kwape tout bandi nan depatman sa, si tout fwa yo ta bay li 500 polis ak ekipman, li t ap pwòpte Vilaj Dedye blanch, li t ap kraze tout kay ki sèvi kachèt bandi, puiske sila ki la yo pa Inosan. Alòske, yo deside rete anba vant bandi yo.
© Tous droits réservés – Groupe Média MAGHAITI 2022
