Pòtoprens, jounen jedi 25 jen 2026 la._ Gen moun k ap jwenn 10 000 kritik pou seleksyon nasyonal foutbòl la, ki fenk sot patisipe nan 2yèm mondyal li aprè 52 zan. Sa vle di ekip la tankou yon ti bebe 2 zan ki fenk ap aprann mache, aprè sa pou li aprann kouri epi travèse lari, jiskaske li ka pran swen tèt li poukont li. Se vre nan premye match kont Ekòs la Grenadye yo te rate anpil bèl okazyon, se vre devan ekip Brezil la nou te ka bay yon pi bèl pèfòmans, men nan 3yèm match devan ekip Mawòk la, seleksyon nasyonal la korije kaye li epi montre sa l peze.
Nou pa dwe chita plenyen sou pennalite abit la pa t ba nou nan premye match la, menm si sa te ka chanje faz jwèt la. Dayè, yo deja trete nou an ti ekip, se nou ki te dwe gofle ponyèt nou menm jan ak ekip Kapvè a pou nou te rache grenn pwen sa oubyen bat Ekòs byen bat. Malerezman, jwè yo te manke konsantre epi te yo manke presizyon ak finisyon.
Devan ekip gwo manman an se te yon lòt reyalite menm si nou te pèdi 3 a 0. Se te yon lòt ekip Ayiti ki te kanpe dan sere devan Brezil sitou nan 2yèm mitan an. Nou woule boul tankou marinad, jwè nou yo kouri sou teren an tankou bourik gran savann, gen moun ki menm di Expérience ak Providence sanble ak 2 moun ki pran dwòg si tèlman mesye yo pa janm fatige. Menm jwè Brezil yo di nou amelyore jwèt nou paske se pa menm Ayiti yo te afwonte an 2004 la. Men elas ! reyalite a anmè tankou fyèl paske depi nan premye mitan an nou te gentan pran 3 gòl nan gòjèt nou. Pèp la ak kwonikè espòtif yo lonje dwèt yo byen long sou antrenè fransè a, Sébastien Migné. Daprè yo, li plen bon zam nan men li men li montre li pa t konn kijan pou li manipile yo nan lagè a. Nou menm nou ale nan menm sans lan tou paske si nou p ap bay tèt nou manti nou dwe admèt Migné bay anpil dezòd nan chwa taktik li yo.
Pou 3yèm match la, nou pèdi l 4 a 2 devan yon gwo ekip, ki se Mawòk. Men nou pa t kite teren an ak tèt nou bese. Dayè, jiskaprezan se gòl Isidor a anpil ekspè klase kòm pi bèl gòl nan premye tou a. Nou menm nou rete kwè bijou sa ap nan top 10 pi bèl gòl nan konpetisyon an kanmenm. Se nou ki make avan, Mawòk vin egalize epi Isidor te reba nou avantaj la jiskaske nou bese entansite a, epi jwè Mawoken yo pwofite pou yo te pran avantaj la. Omwen yo te ba nou lajwa rele anmweyyyyy pandan 2 fwa nan 90 minit sa yo. Se te yon bon match, anpil tizè boul te pran plezi nan gade ekip yo k ap woule boul.
Anpil gwo deklarasyon fèt pandan ti pasaj nou nan Mondyal sa, pami yo se pa Martin Expérience lan ki pi enteresan. Li te di : « Ayiti p ap pran 52 lane ankò pou retounen nan yon Mondyal ». E si n ap byen analize ekip sa, n ap remake jwè yo gen anpil talan ak devouman, epi gen kèk nan yo ki gen kapasite pou yo kraze yon match ak explwa pèsonèl yo. Kounye a, rete pou Federasyon Ayisyen Foutbòl la (FHF) byen ankadre jwè sa yo epi jwenn yon antrenè ki ka jere tout bon zam sa yo sou teren an. Si sa fèt nou rete kwè ap gen sipriz nan konpetisyon Gòlkèp la.
Pandan lontan medya entènasyonal yo se sou ensekirite ak lamizè k ap ravaje Ayiti a yo te fokis sèlman, se tankou yon kanpay denigraman, yo pa te janm pale sou okenn aspè pozitif. Men, ane sa lajenès la chanje done yo. Kòmanse sou Abigail Alexandre ki sot chanpyon nan konkou Elokans nan peyi Lafrans, tonbe nan Ariana Lafrond ki chanpyon nan yon konkou enfliyansè ki t ap fèt an Afrik, ateri sou Melchie Dumornay ki mennen ekip li, Olympique Lyonnais a nan final Lig Chanpyon fanm yo, e ak divès gwo rekonpans li pran. Pou fini, Grenadye yo menm fè tout lemond ap pale de nou nan Mondyal sa. Tout sa se prèv lajenès la pote Ayiti sou tèt li ane sa !
Li lè li tan pou nou konprann deviz nou : « Ansanm nou fò ». Lè nou rasanble, lè na resi deside mete men nan pat la tout bon vre a, pa gen chèn k ap ka reziste.
