Pòtoprens, jounen jedi 7 dawout 2025 lan._ Depi plis pase yon lane politisyen isit te deside mete yon Konsèy Prezidansyèl Tranzisyon (KPT) 9 tèt nan peyi a pou te òganize eleksyon epi pèmèt Ayiti rale yon souf anba gang k ap toufounen pèp la. Men, jounen jodi a, nou sou katriyèm prezidan an okenn nan sa k te di yo poko reyalize. Okontrè, sou prezidans ekonomis Fritz Alphonse Jean an peyi a antre pi fon anba tè. Pou yon 3yèm fwa pwomès pou te bay sekirite, tabli lapè anndan katye yo, bay polisye ki te tonbe nan batay la jistis tout se te pawòl pou te fè moun dòmi.
Nan depatman Latibonit, bandi ak zam yo te ansasinen 3 polisye jou ki te madi 22 jiyè 2025 lan. Yon jou aprè, Fritz Jean ansanm ak Konsèy la te sòti nòt pou te rasire popilasyon an epi pwomèt y ap bay polisye sa yo jistis. Poutan, jis kounye a okenn nòt pa sòti pou ta di si yo te rive jwenn kò ajan yo nan men gang yo alevwa pou yo ta fè yo jwenn jistis jan yo te di l la epi rann yo omaj yo merite a.
Rezo k ap Defann Dwa Moun yo (RNDDH) nan bò pa li, te fè tout moun sezi ak yon rapò yo te pibliye 25 avril 2025 lan kote yo te montre ni gouvènman an ni KPT a tout se yon bann gaspiyè, pwofitè ki pa itil peyi a anyen. Yo te di sa paske yo te fè konprann yo jwenn yon konseye prezidan koute leta 13 500 000 goud chak mwa. Nan kòb sa, lajan fèt ak lòt privilèj pa menm konte. Pou yo manje sèlman, òganis la te di yo jwenn li koute 3 500 000 goud chak mwa. Revelasyon sa yo te konsène Fritz Jean tou ! E sa te fè gwo eskandal nan larepiblik jous KPT a te santi l oblije pou te fè yon sòti krab pou te jistifye tèt li.
Pou sa ki gen pou wè ak plan sekirite peyi a, n ap sonje byen yon mwa aprè l te fin pran tèt KPT a, ekonomis la te vini ak yon koze bidjè lagè. Se konsa, aprè yon konsèy minis, yo tout ansanm te adopte bidjè rektifikatif 2024-2025 ki evalye ak 323,451 milya goud. Nan pwojè sa a, yo te di gouvènman an gen 5 priyorite ki se : ranfòsman sekirite piblik ak nasyonal, redresman ekonomik, sekirite alimantè ak sanitè. Youn nan bagay sa yo pa rive fèt vre. Si nan kòmansman an, te gen bon jan laperèz bò kote gang yo avèk frap dwon kamikaz yo. Ebyen, pwoblèm ant chèf lapolis la, Normil Rameau ak laprimati te koupe sa sèk pandan yon bon tan.
Dayè se pa premye fwa gen blokaj sa yo ant menm dirijan yo ki di y ap batay kont ensekirite a. Nan epòk Gary Conille te premye minis la, New York Times revele li te siyen yon kontra 150 milyon dola vèt chak mwa ak sosyete Studebaker pou te ede lapolis bay peyi a sekirite. Men, yo fè konnen, Konsèy Prezidansyèl Tranzisyon an te kanpe an kwa pou pa t kite sa pase, tankou dosye sekirite a pa priyorite prezidan konseye yo vre. Pi lwen, jounal ameriken an, fè konprann se menm konseye sa yo mete ak kèk gwo tèt nan lapolis la ki te fè konplo pou te ede chèf gang Vitel’homme Innocent chape poul li malgre yo te manke kenbe li. Nan menm atik sa, yo soulinye pou fè konnen konseye yo te fòse moun Studebaker yo pou yo pa t fini misyon yo.
Nan menm Misyon sa, jounal sa fè tout moun konnen gen plizyè polisye ki ta nan gang e ekip Studebaker la gen 2 moun ki disparèt depi anviwon 7 mwa, mete sou sa gen plizyè zam yo genyen tou ki disparèt. Zam sa yo se mak AR-15 e yo estime yo vann 72 mil dola vèt sou mache nwa a.
Nan bilan 5 mwa li fè jodi a nan seremoni enstalasyon nouvo kòdonatè KPT a, Fritz Alphonse Jean vante tèt li kòm moun ki pèmèt plizyè sòlda nan lame Ayiti a pral pran fòmasyon aletranje. Anplis sa, li di gen plizyè dizèn polisye Kanada fòme pou zafè dwon yo, e li anonse gen 400 polisye ki gen pou al pran fòmasyon o Brezil pandan gen 23 lòt sòlda ki ale jodi a epi gen 70 polisye ki ale Meksik. Li atribye tout sa yo tou ak gwo sezi dwòg lapolis te fè sou zile Latòti nan mwa jiyè a. Li di li mete kanpe Ajans nasyonal sekirite ak Konsèy nasyonal sekirite ak defans. Alòske, sou bidjè lagè a, li di gen sèlman 20 % ladan l ki fèt. Li pale sou ranfòsman leta nan nivo ekonomik, siyati yon memorandòm ak kèk estrikti etranjè sou renovasyon ayewopò yo, vwayaj 15 jèn nan klèb foutbòl Ronaldinho epi yon rezo pou leta ka akonpanye jèn fanm ak jèn gason ki sibi vyolans gang yo.
E poutan pandan 5 mwa sa a, rapò 2yèm trimès Biwo Entegre Nasyonzini an Ayiti (BINUH) pibliye a fè kwè gen 1 520 moun ki pèdi lavi yo epi 609 blese sòti avril rive mwa jen an. Pou sa ki gade teritwa ki pèdi menm, Mibalè, Sodo, Lachapèl, Lyankou, ak Pako fè lis la vin pi long. Pandan bilan li a li te konsyan fwontyè terès yo pa gen okenn siveyans sou yo, yon pawòl jounen jodi a ki montre enkoyerans li pa rapò ak pwotokòl akò li te anonse ki te genyen ant lame ak Brigad pwoteksyon lè Pwoteje (BSAP) pou te pwoteje fwontyè yo sitou lanmè a. Menm jan nou te anonse l deja a, sa ki te di lè l t ap pran pouvwa a ak sa li bay kòm bilan jodi a montre klè kou dlo kòk kòman dirijan KPT sa yo se yon bann poupetwèl ki pap regle anyen serye pou peyi a. Fritz Jean kòm gwo ekonomis pa menm rive reyisi bidjè lagè l la nou pa bezwen pale pou antreprenè Laurent Saint-Cyr ki pa menm konn anyen nan politik.
Fòk nou di, avan Saint-Cyr te pran pouvwa a te gentan gen anpil gwo diskisyon ki t ap fèt nan lavi politik la. Kòmkwa moun sa yo pa t janm wè danje pou 2 nèg ki sòti nan sektè prive te vin dirije peyi a. Nan dosye sa, n ap di avèk Laurent kòm prezidan KPT a, epi Alix Didier Fils-Aimé kòm premye minis, peyi a vann nan zobop. Paske si lontan se dèyè kandida yo moun sa yo te konn kache, ebyen jodi a yo gen tout pouvwa yo nan men yo, yo parèt tout tèt yo. Sa vle di, se yo ki pral deside fè sa yo vle ak peyi a, pandan koripsyon pral taye banda epi yo pral pwofite plen pòch yo. Yo ka menm pete koken pou kenbe pouvwa a nèt, dayè yo t ap chache sa lontan sa.
Kòm Saint-Cyr deklare li pral defann medya yo, nou espere tout bon vre pral gen bon jan mezi k ap pran kont tout moun k ap menase libète laprès la. Paske nan figi tout moun gang pran plezi ap menase jounalis. Dènye kou ki pou touye koukou a se ka jounalis Rudy Sanon an, kote 2 chèf gang monte rezo a pou voye pinga bay tout moun ki ap bay emisyon li a esponsò. Yo menm menase moun k ap travay kote sa yo. Tout sa se paske pwofesyonèl laprès la pale sou move aksyon bandi sa yo ap fè popilasyon an sibi.
Pou nou fini, n ap di bòn chans ak bon van ak nouvo kòdonatè a ki gentan ap voye flè pou sektè prive a. Paske nou gentan konnen nan 6 mwa li pral pase nan tèt Konsèy la ka gen gwo deblozay nan mitan menm yo menm nan, puiske se pa t janm koze pèp ki t ap jere vre. Nou la dèyè pòt la, n ap suiv !
Annatandan, nou menm nou la. N ap tann yon lòt bilan menm jan ak pa 3 premye prezidan an oubyen ki ka pi mal. Puiske s on w pakèt enkonpetan k ap dirije nou !
Atik sa se pwopriyete prive ©️ Gwoup Medya MAGHAITI 2025
