Nan yon atik li pibliye jodi mèkredi 30 oktòb 2024 la, Sant Rechèch Ekonomik ak Politik (CEPR) fè konnen gouvènman Garry Conille an siyen kontra ak konpayi Studebaker Defense Group pou kontribye nan zafè sekirite peyi a ankachèt. Daprè yo, pyès moun pa konn wòl moun sa yo, poutan pandan dènye jou yo mèsenè sa yo ta enplike nan divès operasyon lapolis la mennen.
Gwoup mèsenè sa yo pyès moun pa konn konbyen efektif la ye, ni si yo gen zam. Men daprè menm atik sa a, moun k ap travay nan gwoup Studebaker la se yon pakèt ansyen responsab Pentagone ak Santral Entelijans Ajannsi (CIA), se jeneral ameriken ki pran retrèt li, Wesley Clark ki aktyèlman an Ayiti ki ap jere konsèy administrasyon. Daprè sa nou li nan atik sa, moun sa yo an Ayiti depi fen mwa septanm 2024 la.
Nan yon premye tan, estrikti ameriken sa revele deklarasyon sosyete a konsa : « Nan lide pou amelyore sekirite ak kenbe bon jan lapè piblik an Ayiti, gwoup Studebaker te lanse yon inisyativ estratejik sou fòmasyon ak mantora nan tèt kole ak Polis nasyonal ayisyèn nan. N ap opere sèlman sou tit konsiltatif, e nou toujou rann kont bay direktè jeneral lapolis la an pèsonn ».
Poutan, pi douvan menm Sant Rechèch Ekonomik ak Politik sa fè konnen mèsenè sa yo konn planifye e menm al nan operasyon ak lapolis. Se sa k fè, li pran pou egzanp operasyon ki te mennen nan zòn chèf gang Vitel’homme Innocent 15 oktòb pase a, kote bandi yo te mete dife nan youn nan blennde fòs miltinasyonal la.
Pou sa ki konsène vini yo sou sòl la ak akò ki siyen ak gwoup mèsenè sa yo, yo soulinye se premye minis Garry Conille menm ki te regle tout dosye yo ankachèt. Pandan ni anbasad Etazini, ni Konsèy Prezidansyèl Tranzisyon an (KPT) pa t konnen anyen sou dosye sa.
N ap fè konnen, pou fè limyè sou dosye sa Konsèy la te menm voye yon lèt envitasyon ayè madi 29 oktòb 2024 la, pou PM nan lide pou l te al bay eksplikasyon jodi mèkredi a sou prezans moun sa yo nan peyi a e sou divès akò yo te rive siyen yo. Jouskounye a se yon envitasyon ki mete pou yon lòt dat sou demann PM Garry Conille, selon lèt korespondans sekretè jeneral laprimati a, mèt Camille Jr Édouard voye bay sekretè jeneral laprezidans lan, Marie Régine Haddad.
Fòk nou soulinye tou, enfòmasyon sou mèsenè sa yo ki an Ayiti a pran lari kèk jou aprè Ministè Jistis ak Sekirite Piblik (MJSP) peyi a te revele nan dat madi 22 oktòb 2024 la, gen konplo k ap fèt pou ta touye premye minis Garry Conille ak kèk manm nan kabinè li. Nan kominike li te sòti a, Ministè a te di li gen bon jan detay sou kèk endividi ki vle fè zak sa pandan l te mansyone yo ap travay pou kèk sektè espesyal nan lavi nasyonal la.
Atik sa se pwopriyete prive © Gwoup Medya MAGHAITI 2025
