Nan yon kout seremoni ki fèt nan Vila akèy la jodi lendi 7 oktòb 2024 la, konseye prezidan Leslie Voltaire ofisyèlman pran tèt Konsèy Prezidansyèl Tranzisyon an (KPT). Malgre li enstale jan nouvo rezolisyon an mansyone li a, poutan se yon seremoni pasasyon ki fèt san prezans prezidan sòtan an, Edgar Leblanc Fils.
Jan laprezidans te anonse li maten lendi a, efektivman Konsèy prezidansyèl tranzisyon an genyen yon nouvo prezidan ki se, enjenyè Leslie Voltaire. Menmsi enstalasyon an fèt, fòk nou soulinye prezidan sòtan an, Edgar Leblanc Fils pa t mete pye nan Vila akèy la. Sa ki fè, pasasyon an pa fèt jan sa te prevwa a.
Nan diskou sikonstans li fè a nouvo prezidan Konsèy la deklare tout fòs peyi a dwe travay ansanm, e li di Konsèy la poko satisfè paske yo poko tabli sekirite an Ayiti.
« Sou prezidans mwen Konsèy Prezidansyèl la pral travay avèk estrikti yo nan plis transparans ak efikasite. Pèp ayisyen an bezwen lespwa e sitou sekirite pou al mennen lib libè aktivite li yo. Retablisman an ijans sekirite a, reyabilitasyon enstitisyon repiblikèn yo, eleksyon nouvo dirijan e reprezantan popilasyon an se defi nou genyen pou nou leve ansanm », daprè deklarasyon nouvo chèf KPT a.
Yon lòt kote, pandan li te salye memwa viktim Ponsonde yo, Leslie Voltaire pa t manke vante kèk demach li konsidere kòm reyalizasyon Konsèy la. Yon egzekitif 2 tèt, komite pilotaj sou konferans nasyonal ak refòm konstitisyonèl, konsèy elektoral pwovizwa, komisyon jistis verite ak reparasyon, pwogram antre eskolè, repriz travay jidisyè yo, se pami kèk bagay li te site. Li te tou pwofite pwomèt li menm antanke prezidan nan tèt kole ak rès manm KPT a ak gouvènman an pral kontinye travay men nan men pou avansman travay yo.
Leslie Voltaire pran tèt Konsèy la jan sa ekri nan nouvo rezolisyon ki te pran vandredi pase a ki pote siyati tout lòt konseye yo ak 2 manm obsèvatè yo sof Edgar Leblanc Fils ki dayè pa t met pye nan seremoni pasasyon ki fèt jodi a. E nouvo chèf la ta dwe remèt konseye prezidan Fritz Alphonse Jean 7 mas 2025.
Daprè rezolisyon ki pran an konseye prezidansyèl Emmanuel Vertilaire, Louis Gérald Gilles ak Smith Augustin ap toujou nan Konsèy la. Puiske, yo fè konnen nan dokiman ki pibliye nan jounal Le Moniteur a, 3 moun sa yo pwoteje anba prensip prezonpsyon inosans lan. Kidonk, yo menm ki siyen rezolisyon an yo fè yon depasman yon fason pou peryòd tranzisyon an kapab reyisi.
Atik sa se pwopriyete prive © Gwoup Medya MAGHAITI 2025
