Direktè egzekitif Rezo Nasyonal K ap Defann Dwa Moun (RNDDH) nan, Pierre Espérance bay estimasyon l sou bandi ki tonbe nan echanj kout bal ak lapolis nan Bèlè. Se nan sans sa, defansè dwa moun nan deklare jounen jedi 29 dawout 2024 la tout bandi k ap reziste ak polisye yo dwe jwenn santans yo.
Aprè 2 jounen operasyon Polis Nasyonal Ayiti (PNH) a te tanmen nan katye Bèlè a Direktè egzekitif RNDDH la, Pierre Espérance drese yon premye bilan pou operasyon sa. Daprè sa l fè konnen genyen anviwon 18 bandi ki mouri nan afwontman ak ajan fòs lòd yo.
Defansè dwa moun nan mande ak polisye yo pou touye tout bandi ki pa vle remèt zam. Pou mesye Espérance, chak yon gang mouri sa anpeche gen plis viktim nan mitan popilasyon an.
Pandantan sa otorite yo nan lapolis la nan bò pa yo poko kominike okenn detay sou operasyon sa. Men nan premye jounen an ki te madi 27 dawout 2024 la, PNH la te enfòme li gen 3 ajan SWAT ki te sòti blese e ki pou kounye a ap pran swen lopital.
Atik sa se pwopriyete prive ©️ Gwoup Medya MAGHAITI 2024
