24 trè tan aprè polisyè 28yèm pwomosyon nan Polis Nasyonal Ayiti (PNH) a fin pèdi lavi l nan Dèlma 75, enstitisyon an anonse li arete 2 sispèk pami yo yon polisye UDMO.
Nan yon nòt li pibliye sou paj Fesbouk li jodi jedi 29 dawout 2024 la, Lapolis enfòme li arete Jean Andersen Cantave yon ajan 2 ki fè pati UDMO/Lwès ak tout madanm li Nathalie Michel li menm ki se sè viktim nan. Moun sa yo selon sa PNH la di, jwenn arestasyon yo akoz yo ta enplike nan asasinay polisyè a.
Lapolis ki site rapò jij lapè ki te fè konsta krim nan fè konnen viktim nan te resevwa plizyè bal nan kò l. An menmtan, li raple polisyè Nathanielle Médjine Michel ta pra l jwenn lanmò l nan moman l ta pra l travay nan antèn polis ki twouve l nan Dèlma 75 lan. Toutfwa, li presize se endividi nan yon machin Toyota Land Cruiser, koulè blan ak yon ba wouj ki retire lavi 28yèm nan.
Responsab yo nan PNH la ki voye senpati yo bay fanmi viktim nan pwofite fè konnen zak sila pa p rete san l pa pini. Pandan l anonse Direksyon Santral Polis Jidisyè (DCPJ) a ouvri yon ankèt pou l ka jwenn otè ak konplis ki patisipe nan asasinay polisyè a.
Atik sa se pwopriyete prive ©️ Gwoup Medya MAGHAITI 2024
