Yo se plizyè santèn abitan nan Gantye ki te mache jounen mèkredi 28 dawout 2024 la, pou denonse zak ensekirite yo ki pa sispann fèt anndan komin nan.
Abitan sa yo nan revandikasyon yo mande ak leta santral la pou l pran responsablite l fas ak zak bandi 400 mawozo yo ki pa sispann teworize popilasyon an.
Mach pasifik sa ki te gen objektif denonse fenomèn ensekirite a te sòti nan zòn Lasous pou t al bout nan lokalite Site. Se te yon okazyon pou kèk nan manm òganizatè yo te voye yon mesaj bay gouvènman tranzisyon an.
Pastè Franck Joseph, youn nan òganizatè mouvman sa ki pwofite felisite popilasyon an ki desann vin manifeste, raple se depi 12 jiyè pase a bandi yo ap fè vyolans nan komin Gantye. Sa ki daprè li menm lakoz anpil moun kouri kite kay yo e te menm anpeche egzamen leta yo fèt nan zòn sa.
Nan sans sa, lidè relijye a mande otorite yo nan lapolis la pou yo pran responsablite yo fas ak zak kriminèl yo sitou pou antre lekòl la ki prevwa fèt premye oktòb k ap vini la.
Atik sa se pwopriyete prive ©️ Gwoup Medya MAGHAITI 2024
