Nan yon kominike li rann piblik jounen jedi 28 dawout 2024 la, Fondasyon Zanmi Timoun kritike kondisyon otorite yo nan Repiblik Dominikèn depòte timoun yo an Ayiti. Yo soulinye yo voye yo tounen alòske pa gen moun ak yo nan pwen fwontyè Beladè a.
Estrikti sa k ap fè pwomosyon dwa timoun nan sosyete a di li wè pandan plizyè mwa jan depòtasyon timoun ki pa akonpanye yo vin pi plis. Timoun sa yo, daprè sa li di souvan pa gen èd, san pwoteksyon epi twouve yo nan yon kondisyon frajil kote yo ekspoze ak ensekirite epi yo pa jwenn soutyen.
Pou l jistifye sa l di a, òganizasyon dwa timoun nan revele nan dat 13 dawout pase a yon adolesan ki ansent 4 mwa te antre nan sant transpò “Zanmi Timoun” lan nan Beladè aprè l te kouri pou move kondisyon lavi nan peyi Ayiti epi al pran refij nan Repiblik Dominikèn.
Adolesan sa se yon viktim abi nan men matant li, otorite dominikèn yo te arete l nan dat ki te 12 dawout pase a, daprè fondasyon an. Malgre li gen 4 mwa ansent, sa pa t anpeche l sibi vyolans fizik nan men ajan imigrasyon yo pandan 24 èdtan li te fè nan prizon an.
Pou sa, fondasyon Zanmi Timoun kwè depòtasyon timoun ki pa ak moun sa yo fè pati vyolasyon grav nan dwa Timoun nan. Dayè yo eksplike Konvansyon Entènasyonal sou dwa timoun nan pwoteje e Repiblik dominikèn te siyen l. Li raple tou atik 22 konvansyon an di leta dwe garanti pwoteksyon ak asistans timoun refijye oswa moun k ap chèche azil, sitou moun ki pa akonpanye yo.
Nan sans sa, òganis dwa timoun yo mande otorite dominikèn yo pou yo respekte dwa fondamantal timoun yo e pou yo respekte nòm entènasyonal pou pwoteksyon yo.
Atik sa se pwopriyete prive ©️ Gwoup Medya MAGHAITI 2024
