Pou fete 16 lane yo, Solidarite Fanm Ayisyen Jounalis (SOFEHJ) te òganize vandredi 23 dawout 2024 la, yon bwase lide sou responsablite medya yo fas ak vyolans k ap fèt sou fanm ak tifi (VFFF), nan Bibliyotèk Michel Tardieu a ki chita kò l nan Petyonvil. Nan sans sa, divès espesyalis te pale sou yon sijè ki te sòti nan tèm jounen an, ki ta pral bout ak yon atelye pou te fè konsta yo e pote konsèy.
Nan evènman sa responsab estrikti a rele “World café“, plizyè pèsonalite tankou pwotektè sitwayen an, Renan Hédouville, kòdonatè Enstiti Panòs la, Jean Claude Louis, Anson Dasius ki se reprezantan OCNH te prezan. Yon lòt kote, nou te jwenn tou plizyè manm estrikti a, kòdonatris jeneral SOFEHJ la, Martine Isaac ak plizyè lòt aktè nan sosyete sivil la.
Pou sa ki gen pou wè ak entèvenan ki te pale sou tèm nan responsablite medya yo fas ak vyolans k ap fèt sou fanm ak tifi (VFFF) a nan yon premye tan te genyen reprezantan OCNH la, Anson Dasius ki te debat sou Vyolans sou Jan (VBG). Yon lòt bò, te genyen Me Rebecca Revali ki te pale sou prizanchaj Vyolans sou Jan (VBG) ak kibò yon viktim kapab pote plent. Pou dènye entèvansyon an, kòdonatè jeneral Asosiyasyon Jounalis Ayisyen (AJH) an li menm, Jacques Desrosiers te pale sou wòl medya yo ka jwe nan konbat vyolans sou medam yo.
Nan deklarasyon manm Solidarite Fanm Ayisyen Jounalis yo fè, yo fè remake jounen sa pèmèt yo kapab wè plas tematik vyolans genyen nan medya yo. Pou tèt sa, yo rekòmande pou medya yo ta re oryante yo yon fason pou kapab bay jarèt plis avèk tèm sa yo.
«Nou genyen nan men nou antanke jounalis pou n al fè emisyon, travay, pran medya yo pou n al bay tematik sa plas li nan medya. Paske lè n fè konsta nou wè tematik vyolans lan li pa gen tout plas li nan medya, yon moun ka viktim yo fè yo ti pale sou li tandiske lòt tematik ki ap trete nan sosyete a gen plis plas», daprè kritik jounalis Chrisnette Saint-Georges. Pi lwen, li di li kwè pou 16 lane sa tou, se te yon opòtinite yo te genyen pou te konprann pi byen se laprès ki dwe mennen sosyete a olye se yo k pou ta kite moun mennen yo.
“Degaje nou kou mèt Janjak pou nou rebay sosyete a imaj li, paske yon sosyete nan nivo li ye a, delenkans jan genyen l lan, se laprès ki ka ba nou yon bourad pou remete l nan plas li te ye a”, toujou selon vwa meteyo ayisyen an.
Pou fini, Madanm Saint-Georges ansanm ak plizyè jounalis ki te patisipe nan atelye ki te fèt la mande pou medya yo aprann fè chwa konsènan sijè yo. Puiske yo menm, yo fè kwè yo rive wè se faktè ekonomik ki pafwa konn fè vyolans pa trete nan espas medyatik la, kidonk yo konseye pou gen plis pwodiksyon nan sans sa yon fason pou deriv sosyete a kapab kaba, e rive gen sosyete tout ayisyen reve a tout bon.
Atik sa se pwopriyete prive ©️ Gwoup Medya MAGHAITI 2024
