Nan yon lèt li voye bay direktè Diresksyon Santral Polis Jidisyè (DCPJ) a, enspektè jeneral Pierre René François, Asosiyasyon Jounalis Ayisyen yo (AJH) di l swete gen yon rankont enfòmasyon sou jounalis non yo site nan koze kolaborasyon ak gang yo.
Nan korespondans sa li voye jodi jedi 22 dawout 2024 la, AJH pwofite salye travay sa DCPJ ap fè nan batay kont bandi ak krim nan peyi a. Pwiske fenomèn sa yo daprè sa l di, mete peyi a nan yon kriz sekiritè ak imanitè san parèy.
«Nan kad aksyon DCPJ yo, yo te arete travayè laprès. Gen lòt ki idantifye nan yon dokiman ki sòti 15 jiyè 2024 la epi yo atribiye nan Biwo Zafè Kriminèl Direksyon Santral Polis Jidisyè a» , se sa nou li nan lèt sa.
Men, AJH fè konnen nan kad misyon li genyen li menm pou asire respè libète laprès ak règ etik, disiplin ki gouvène egzèsis pwofesyon jounalis la, responsab yo nan estrikti a swete gen yon rankont enfòmasyon sou kesyon sa yo k ap fè aktyalite nan divès medya yo.
Asosiyasyon an ki vle retire tout lide ki ta fè kwè l ap antrave travay DCPJ a, deklare demach li a se pito yon mannèv pou pèmèt li genyen bonjan enfòmasyon pou yon evalyasyon sou objektif sitiyasyon sa pwofesyonèl laprès sa yo ta twouve yo a.
Atik sa se pwopriyete prive ©️ Gwoup Medya MAGHAITI 2024
