Nan yon kominike pou laprès yo pibliye jodi madi 20 dawout 2024 la, Depatman Trezò ameriken an anonse yo pran sanksyon kont ansyen prezidan Michel Joseph Martelly. Otorite ameriken di yo pran desizyon sa paske yo jwenn ansyen chèf leta a te nan trafik dwòg nan peyi a.
“Jodi a Ofis Kontwòl byen Etranje (OFAC) nan depatman Trezò ameriken an sanksyone ansyen prezidan Ayiti a, Michel Joseph Martelly“, se sa nou li nan kominike sa a. Yo fè konnen aksyon sa vini menm jan dekrè egzekitif (EO) 14059, 15 décembre 2021 an, ba yo dwa pou enpoze sanksyon kont etranje ki enplike nan vann dwòg.
Pi lwen pou jistifye desizyon yo a, responsab ameriken yo fè konprann Martelly te itilize enfliyans li pou te rann pi fasil trafik kokayin pou ale Etazini. Mete sou sa, yo akize l kòm moun ki lage kò l nan blanchiman pwodui dwòg ki ilegal. E yo soulinye tou, akize a te rive travay ak trafikan ayisyen e bay kout men ak plizyè gang ki Ayiti.
Nan sans sa, depi kounye a Michel Joseph Martelly pap ka jwenn lajan prete/kredi nan men okenn bank ameriken, tout tranzaksyon ki ap fèt Etazini ki enplike l entèdi. Yon lòt kote, yo entèdi kèlkeswa moun li ye a pou ta envesti oubyen achete kapital oubyen dèt Martelly.
OFAC tou pwofite raple nan ka sa, sitwayen ki pa ameriken kapab pran sanksyon tou si toutfwa yo ta deside vyole mezi ki pran yo. Se pou sa, yo tou deklare Etazini detèmine pou rann lavi enposib ak moun ki nan aktivite k ap ankouraje gang yo.
Pandantan sa, n ap fè konnen yo fè kwè yo menm y ap batay bò kote pa yo pou kontinye pran responsabilite yo. E trase yon demen miyò epi demokratik pou tout Ayisyen.
Atik sa se pwopriyete prive ©️ Gwoup Medya MAGHAITI 2024
