Aprè gwo tansyon ki te genyen anndan prizon sivil Senmak la e nan zòn sou kote yo ayè vandredi 16 dawout 2024 la, yon premye bilan ta fè kwè gen 15 prizonye ki mouri, epi yon sèl chape poul li. Selon otorite yo, endividi sa yo mouri nan moman yo t ap eseye sove kite prizon an.
Menmsi komisè gouvènman an, Venson François poko kominike chif ofisyèl yo, li rive konfime nan divès entèvansyon li fè lanmò plizyè prizonye ak lòt ki sove. Yon lòt kote, li fè konnen gen 2 polisye ki sòti blese kote youn pran bal epi lòt la ki ta gen zo kase.
Selon Radyo Métronome ki site sous li, genyen 6 prizonye ki ap pran swen lopital. E sou yon total 550 prizonye responsab yo te anrejistre 15 dawout 2024 la, yo soulinye se sèlman 534 ki ta rete nan prizon an.
Pou sa ki konsène dega ki fèt yo, komisè François deklare gen divès pati nan batiman an prizonye yo rive boule. Li eksplike tou, sitiyasyon sa pase aprè otorite penitansyè yo te louvri selil yo pou prizonye yo te ka benyen epi yo te tou pwofite okazyon an.
”Yo boule tout dòtwa polisye yo ak tout sa yo te genyen, yo boule enfimeri, biwo ADM, yo boule tout sal gad”, daprè deklarasyon otorite a ki fè konprann te gen plizyè nan endividi yo ki te gen zam nan men e ki te agresif nan moman evazyon an. Se sa ki fè tou, daprè li menm gen plizyè ladan yo ki pèdi lavi yo.
Pou kounye a, nimewo 1 nan vil Senmak la konseye popilasyon an rete vijilan, puiske gen prizonye ki sove ak zam nan men. Pandantan sa, li tou pwofite fè konnen tout bagay sou kontwòl anndan prizon an.
sa se pwopriyete prive ©️ Gwoup Medya MAGHAITI 2024
