Nan yon rapò Rezo Nasyonal k ap Defann Dwa Moun (RNDDH) mete deyò nan dat 15 dawout 2024 la, li di l resanse omwen 66 moun ki mouri oswa disparèt sòti nan mwa janvye pou rive jiyè 2024 la.
Selon sa rapò a revele, nan viktim yo genyen yon timoun, 4 ajan Polis Nasyonal Ayiti (PNH), 15 fanm, ansanm ak 12 moun ki genyen ant 60 ak plis pase 80 lane.
Toujou nan menm rapò sa, oganis dwa moun nan di nan kad ankèt li mennen ak plizyè òganisasyon fanm, yo jwenn genyen omwen 46 viktim vyolans seksyèl pami yo 3 tifi.
RNDDH yon lòt kote, fè konnen sòti mwa me pou rive jiyè 2024, òganizasyon OFAKOLAM anrejistre 11 moun ki sibi vyolans seksyèl. Nan detay responsab yo bay yo, yo fè konprann se nan kad atak bandi ak zam moun sa yo rive viktim.
Yo presize nan dat 20 ak 21 jiyè pase a, 23 fanm bandi ak zam te kidnape te rive jwenn liberasyon yo nan yon operasyon ajan PNH yo te tanmen nan Monvil, yon lokalite nan Gresye. Chif sa yo RNDDH kominike a, se daprè sa majistra vil la, Jean Vladimir Bertand te revele.
Pami 23 fanm sa yo, kriminèl yo vyole 15 ladan yo. Rezo a soulinye bandi yo te vyole medam sa yo yo te kidnape a nan yo machin ki t ap pran direksyon Gransid la.
Devan yon sitiyasyon parèy òganis dwa moun nan kwè lapolis ak otorite yo nan lajistis lan pèdi fòs. Poutèt sa, li mande nouvo dirijan yo sètifye epi bay PNH la bon jan mwayen yon fason pou l ka fè fas ak bandi ak zam k ap teworize popilasyon an nan Kafou ak nan Gresye.
Pandantan sa, li swete otorite yo travay pou retabli lapè ak sekirite nan peyi a. Yon mannyè k ap kapab pèmèt fanmi yo tounen lakay yo.
sa se pwopriyete prive ©️ Gwoup Medya MAGHAITI 2024
