Daprè yon rapò ki sòti nan òganizasyon “Save the Children” lendi 12 dawout 2024 la, omwen 131 timoun mouri oswa blese pandan atak gang nan katye yo. Pami chif sa yo fè konnen genyen tibebe ki pèdi lavi yo tou e yo presize moun yo viktim pandan atak ak afwontman ant bandi yo ak lapolis pandan 6 premye mwa ane 2024 la.
Selon chif Òganizasyon Nasyonzini (ONU) di li jwenn, nan menm peryòd sa se yon total 5 timoun ki viktim vyolans nèg ak zam pa semèn. Men, “Save the Children” epksplike kantite timoun ki afekte kounye a yo te ka pi wo akoz gen nan yo ki viktim bal pèdi tou. Yon lòt bò li soulinye gen nan timoun yo ki sible kòm toutè gang oswa Lapolis sa ki fè yo boule yo lè yo viktim.
Òganizasyon an ale pi lwen pou l raple nan dat ki te 5 jiyè 2024 la, bandi te touye epi boule yon ti gason 10 lane nan Solino akoz yo te akize l kòm toutè yon chèf gang. Yo konsidere aksyon sa tankou yon egzanp trajik ki montre vyolans ak britalite sitiyasyon an ak vilnerabilite timoun nan zòn gang kontwole yo.
Nan sans sa, Chantal Sylvie Imbeault ki se direktris nasyonal “Save the Children” nan eksprime enkyetid li pou nivo kriz la. «Nou pa jwenn mo pou n dekri gwosè soufrans jèn ayisyen yo ap andire. Timoun yo dirèkteman vize oswa yo nan mitan 2 dife, e tout katye yo chaje ak gang», se sa direktris la deklare.
Pandantan sa, responsab la fè konnen dèyè chif sa ki bay gwo kase a, se anpil rèv ki vole ale. Li fini pou l di gen anpil chans pou chif yo plis pase sa yo anrejistre yo.
sa se pwopriyete prive ©️ Gwoup Medya MAGHAITI 2024
