Divès asosiyasyon majistra tankou APM, ANAMAH, RENAMAH ak AJUPHA reyaji aprè Ministè Jistis ak Sekirite Piblik (MJSP) te mande yo kanpe sou grèv yo a. Ministè a te pase lòd sa nan dat ki te 6 dawout 2024 la.
Asosyasyon Nasyonal Majistra Ayisyen (ANAMAH), Asosyasyon Pwofesyonèl Majistra (APM), Asosyasyon Jij Ayisyen pou Lapè (AJUPHA) ak Rezo Nasyonal Majistra Ayisyen (RENAMAH) eksprime gwo kè kase yo genyen pou nòt sa MJSP te pibliye a. Kote kominike sa te adrese l ak komisè gouvènman yo nan tribinal premye enstans yo.
Ansanm asosiyasyon sa yo estime nòt sa se yon fason pou fè majistra yo pè. Nan sans sa, yo deklare yo ap kontinye bay sipò yo ak Kolektif Majistra Debou Ayiti, ki se estrikti ki te chwazi pote revandikasyon jis ak legal travayè yo nan sistèm jidisyè a.
Malgre sa, Asosyasyon sa yo di yo rekonèt grèv la anpeche aparèy jistis la fonksyone jan sa dwe fèt. Men tou, yo vle peze sou sitiyasyon sa ki vini aprè yon bann move tretman yo sibi.
Pou fini, yo mande jij tribinal yo pou yo pote kole ak kòlèg yo nan lajistis la fas ak gwo menas sa ki mete dwa pou yo fè grèv an danje. Yo pwofite raple tou, konstistisyon an bay tout Asosiyasyon sendikal yo dwa pou kanpe travay epi egzije bon jan tretman.
CP: Communauté Saint Martin
sa se pwopriyete prive ©️ Gwoup Medya MAGHAITI 2024
