Nan kad yon operasyon lapolis tanmen nan tèt kole ak abitan komin Ansdeno anviwon 7 bandi jwenn lanmò yo jounen dimanch 10 dawout 2024 la. Daprè presizyon responsab yo, aksyon sa pase egzakteman nan lokalite Boudon, dèzyèm seksyon kominal Ansdeno.
Se vis prezidan Asosiyasyon kazèk Grandans lan, Louis Dariode ki konfime enfòmasyon sa. Li fè konnen, peyizan yo depi kèk tan t ap viv ak laperèz akòz fenomèn ensekirite a ki tabli kò l nan depatman an.
Yon lòt kote, kazèk la eksplike se gras ak vijilans kèk manm nan popilasyon an ak operasyon lapolis la bandi sa yo rive pase nan operasyon bw@ kale a. Li di tou abitan yo rekipere 6 kilomèt nan 30 kilomèt gang yo te okipe nan komin nan.
Pi lwen, Louis Dariode eksplike kijan abitan sa yo ki te gen kay yo boule e sila yo ki te kouri pou bandi kòmanse pran konfyans pou tounen lakay yo. Pandantan sa, li raple se gras ak entèvansyon ajan UDMO ki fè ensekirite a ki gen plis pase 3 lane nan komin nan ka kòmanse derasinen.
Frantz St-Armand ki se responsab lapolis la nan depatman an, yon lot bò di li bay tèt li misyon pou rejyon an pa sèvi kachèt pou bandi. Li pwofite envite popilasyon an pou kolabore avèk li yon fason pou l ka bay bon jan rezilta.
N ap fè remake, pami viktim yo genyen 3 manm nan yon sèl fanmi ki pran bw@ kale. 3 moun sa yo se yon papa ak 2 pitit, selon presizyon vis prezidan asosiyasyon kazèk Grandans la.
Atik sa se pwopriyete prive ©️ Gwoup Medya MAGHAITI 2024
