Nan yon nòt pou laprès ki sòti samdi 9 dawout 2024 la, Ministè Agrikilti Resous Natirèl ak Devlopman Riral (MARNDR) fè konnen li dekouvri plizyè ka maladi ki sanble tèt koupe ak maladi chabon.
Daprè sa Ministè a anonse ka maladi sa a se nan vil Tigwav ak nan divès lòt lokalite nan depatman Sid ak Sidès peyi a yo dekouvri l.
Nan detay responsab yo bay nan nòt sa, yo presize maladi chabon an se yon maladi ki atrapan anpil. Yo eksplike tou lè yon bèt fè maladi sa, moun yo ap ka remake san ap sòti nan tout twou ki nan kò li tankou zorèy, twou nen, elatriye. Ministè a soulinye, bèt ki fè maladi chabon pa gen chans viv paske yo ap mouri bridsoukou.
Pou sa ki gen pou wè ak moun ki fè maladi sa, MARNDR fè konnen maladi sa prezante sou moun sou plizyè fòm. Bouton ki leve sou po, pwoblèm respirasyon ak dijesyon se kèk sentom moun ki kontaminen yo ka genyen.
Nan sans sa, otorite yo nan Ministè a mande ak popilasyon an pou fè anpil atansyon ak bèt ki prezante sentom maladi chabon an. Li tou pwofite mande moun yo pou yo pa manje vyann bèt, ni vann vyann zannimo yo sispèk ki malad yo. Poutèt sa, yo konseye sitwayen yo pou antere bèt ki tonbe mouri yo nan yon twou ki gen 6 pye epi kouvri l ak lacho.
Atik sa se pwopriyete prive ©️ Gwoup Medya MAGHAITI 2024
