61 moun rive pèdi lavi yo nan yon avyon ki fè krash jodi vandredi 9 dawout 2024 la, nan vil Sawo Pawolo, Brezil. Selon divès medya lokal ki rapòte pawòl otorite brezilyen yo, poko gen okenn enfòmasyon sou kisa ki ta lakòz malè sa rive, kote yo konte plizyè viktim nan.
Pami 61 viktim sa yo, konpayi ayeryèn Voepass ki te responsab vòl la fè konnen te gen 57 pasaje ak 4 manm ekipaj avyon a nan vòl la. Yo eksplike tou, avyon sa ki gen mak ATR 72-500 te respekte tout règ yo, e pwofite di tout bagay te byen nòmal rive kèk minit avan dram nan ki te vin pase nan 13è 25.
Se yon aksidan ki pwovoke anpil reyaksyon bò kote otorite brezilyen yo ak abitan yo. Se sa ki fè, Prezidan Luiz Inacio Lula da Silva deside pibliye 3 jou lapèn sou tout teritwa yo a.
Pou kounye a, responsab nan peyi sa anonse kadav viktim sa yo deja nan wout pou al nan mòg annatandan rezilta tout ankèt fòs lòd yo ap mennen. Sa ap fèt konsa, nan kad pou konnen sa ki pwovoke aksidan an, men tou pou idantifye moun ki pèdi lavi yo pandan dram sa.
N ap fè konnen, daprè Sant Envestigasyon ak Prevansyon Aksidan Ayewonotik (CENIPA), pou kòmansman ane a san konte nouvo ka sa a, Brezil anrejistre 108 aksidan avyon ki bay 49 viktim. Ototal sou 10 dènye ane yo, yo jwenn gen 1665 aksidan ki fèt kote 746 moun mouri.
Atik sa se pwopriyete prive ©️ Gwoup Medya MAGHAITI 2024
