Biguerline Francklin, se non elèv segondè 4 sa ki rive pèdi lavi li ayè madi 6 dawout 2024 la, aprè yon kamyon sitèn te pote boure sou moto li te ye a. Aksidan sa rive nan zòn Bitbwaye nan Laplèn, nan moman elèv la ta pral konpoze nan zòn Bitbwaye nan Laplèn.
Selon enfòmasyon Ministè Edikasyon Nasyonal ak Fòmasyon Profesyonèl (MENFP) pataje nan sikonstans lan, yo fè konnen elèv sa genyen 19 lane, li te lekòl nan lise Sibè ki twouve l nan Kwadèboukè. Yo eksplike nan moman aksidan an, viktim nan te avèk yon kamarad li ki pote non Roobens Stravensky Jean-Baptiste.
Nan kominike li pibliye jodi jedi 8 dawout 2024 la, MENFP presize tou Biguerline Francklin te rann dènye souf li anvan menm li te rive lopital. Tout sa rive malgre tout jefò ak dilijans ki te fèt pou te mennen l lopital la, daprè sa nou li nan nòt la.
Pou sa ki gade kamarad ki te akonpanye viktim nan, responsab yo nan Ministè a fè konnen malgre chòk li sibi nan moman aksidan an li te rive kanmenm sibi egzamen yo. Se pou sa, Roobens Stravensky Jean-Baptiste jwenn felisitasyon nan men gran tèt ministè a. E yo te pwofite fè kwè se nan tèt ansanm ak anpil vijilans tout popilasyon an dwe kontinye travay pou garanti sekirite elèv yo nan tout sikonstans.
Atik sa se pwopriyete prive ©️ Gwoup Medya MAGHAITI 2024
