Nan yon nòt li pibliye mekrèdi 7 dawout 2024 la, Inisyativ Sosyete Sivil (ISC) di se ak anpil enkyetid li ap gade evolisyon sitiyasyon sekirite a ak sosyopolitik nan peyi a. Yo di yo fè remak la depi lè Konsèy Prezidansyèl Tranzisyon (KPT) an ak gouvènman Premye minis Garry Conille ap dirije a pran pouvwa a.
ISC di li konstate nan zafè sekirite bandi yo boude pwopozisyon depoze zam chèf primati a te fè yo a, epi yo refize rekonèt otorite leta. Yo kontinye pou di: “gang yo malgre pèt yo anrejistre, ap òganize tèt yo pou reziste epi fè fas ak entèvansyon fòs nasyonal ak miltinasyonal la”.
Nan nòt sa, asosiyasyon an detaye pou l fè konprann bandi yo atake anpil byen nan pi wo nivo leta a. Pandantan sa, yo soulinye krim òganize nasyonal ak entènasyonal la detèmine pou kenbe peyi a nan sitiyasyon feblès li ye a. Alòske, responsab yo pa kapab pwoteje popilasyon an ni ba yo sèvis ki pi fondamantal yo tankou asire sekirite, sante, edikasyon, e menm bay posiblite pou moun yo siviv.
ISC eksprime gwo tèt chaje ki genyen lè yo konsidere kriminèl yo òganize tèt yo pou kontinye sèvi ak peyi a kòm zòn pou fè tout tip trafik.
«Lidè aktyèl yo ansanm ak kominote entènasyonal la, ki bay sipò li, dwe fè bilan sou danje ki menase peyi a ak rejyon an. Jefò yo dwe koresponn ak responsablite yo ak defi aktyèl la, nan sa ki gen pou wè ak finansman, pèsonèl, ekipman, minisyon ak ekspètiz. Twoup yo ak ekipman an plas pa kapab ase. Anplis sa, etablisman Konsèy sekirite nasyonal la se yon nesesite», se sa nou li nan nòt sa.
Nan sans sa, responsab yo nan estrikti a kwè pouvwa egzekitif la ta dwe nan yon tan tou kout mete kanpe pwosesis pou mete kontwòl sou aksyon gouvènman an. Se nan konsa, yo eksplike sa ap kapab pèmèt diferan sektè nan sosyete a rive chwazi pèsonalite kredib, konpetan e ki gen eksperyans pou ka voye je sou aksyon gouvènman an.
Atik sa se pwopriyete prive ©️ Gwoup Medya MAGHAITI 2024
