Gwoup gang 400 Mawozo, yon lòt fwa simen latwoublay nan komin Gantye a. Jodi dimanch 4 dawout 2024 la, yo mete dife nan yon machin blennde Polis Nasyonal Ayiti a (PNH).
Aprè gwoup gang k ap kontwole komin Kwadèboukè a te mete dife epi kraze komisarya Komin Gantye a nan semèn ki sot pase a, jounen dimanch lan yo pase nan yon lòt etap.
Bandi sa yo ki te deja soude yon pon ki genyen ant Gantye ak Fonparizyen kontinye ap feraye. Malgre otorite yo pa bò isit te tante asire popilasyon an ak yon seri deklarasyon, tankou y ap reprann kontwòl peyi a katye pa katye, sa pa anpeche moun kontinye kouri kite kay yo akoz zak teyoris yo.
Depi atak gwoup gang ki sou kontwòl lanmò 100 jou a, anpil abitan komin Gantye a te oblije al pran refij yo nan Fonparizyen, yon sitiyasyon ki te leve plim sou do chèf gang nan epi anonse l ap atake zòn fwontalye a.
Pou kounye a, nou pa konnen si genyen polisye ki viktim, men nan yon videyo li fè, chèf gang 400 Mawozo a santi li an konfyans paske selon sa l deklare kòmisè a kouri.
sa se pwopriyete prive ©️ Gwoup Medya MAGHAITI 2024
