Yo se plizyè ti machann anba galeri anba lavi l la ki kontinye ap leve vwa yo pou mande otorite yo pou ba yo yon kote pou yo chita pou vann komès yo.
Kèk nan machann sa yo fè kwè yo pèdi chòp, machandiz soulye, rad, elatriye, fè konnen yo lage 2 bra pandye akoz sitiyason ensekirite ki tabli kòl anba lavil peyi a depi yon bon bout tan. Selon temwanyaj kèk nan yo, yo gen lekòl pitit pou yo peye, mari ak fanmi pou yo ede. Nan sans sa, yo mande ak otorite yo pou pran responsabilite yo.
Machann yo pwofite tou pou denonse ven mil goud (20000 goud) ministè Komès ak Endistri ta reponn pou l ba yo nan non leta. Lajan sa pap menm ka achte yon kès soulye daprè machann sila yo ki ale pi lwen pou fè konnen yon chanm kay pou mete bizniz lan koute ant 4 ak 5 mil dola ameriken pou yon lane.
Selon youn nan viktim yo, yo resevwa lòd pou pa retire machandiz yo genyen anba lavil la. Mete sou sa, bandi ak zam yo piye yo. Youn nan machann yo fè konnen li viktim 2 fwa, li pwofite mande ak Premye minis Garry Conille pou dedomaje yo epi ba yo yon kote pou yo ka vann. Anplis, machann yo di yo pa dakò pou òganizasyon resevwa kòb sou non yo.
Atik sa se pwopriyete prive ©️ Gwoup Medya MAGHAITI 2024
