Nan yon rapò yo rann piblik jodi madi 30 jiyè 2024 la, Biwo Entegre Nasyonzini nan peyi Ayiti (BINUH) fè konnen gen omwen 1 379 moun ki rive pèdi lavi yo ak blese. Daprè presizyon yo bay, chif sa yo se pou dezyèm trimès ane 2024 la.
Rapò sa BINUH mete deyò jodi a revele gang ak zam yo kidnape omwen 428 moun nan sèlman 3 mwa. Pi lwen, yo fè konprann sòti avril pou rive jen 2024 la, ogmantasyon vyolans seksyèl sitou nan zòn ki sou kontwòl gang yo lakoz pou pi piti 49 ti gason ak tifi pèdi lavi yo oubyen blese pandan atak endividi ak zam yo. Yo soulinye tou, gen nan timoun sa yo ki viktim nan bal mawon pandan operasyon lapolis.
Òganis onizyen an presize nan kòmansman mwa fevriye ak mwa mas la, gang yo te pouswiv taktik yo kote yo te rive piye, mete dife nan biwo piblik yo nan zòn metwopolitèn Pòtoprens lan. Nan depatman Latibonit, yo di gang yo te boule epi kraze plis pase 450 kay ak komès.
Pandantan sa, bandi yo kontinye ap mete dlo nan je manm popilasyon an. Sa ki fè zak vyolans yo ogmante pi plis toujou selon sa responsab BINUH yo montre nan menm rapò sa. Puiske, pandan mwa avril, me ak jen pase a yo di gen 128 moun ki pèdi lavi yo osnon blese nan Dèlman 24 ak Solino.
Pou sa ki konsène sitiyasyon k ap pase nan Komin Gresye a, ki se youn nan zòn ki anba kontwòl gang ak zam depi kèk jou, rapò BINUH an raple gwoup gang 103 Zonbi fè vyolans seksyèl sou moun yo, e touye sila yo ki konn ap denonse move pratik y ap fè yo. Dayè daprè deklarasyon majistra komin nan, Jean Vladimir Bertrand te fè nan kòmansman mwa jiyè a, 70% vil la se bandi ki kontwole l.
N ap fè konnen nan sèlman 3 mwa, 233 moun mouri ak blese nan komin Kafou ak Gresye. Komin Kafou pou kont li, gen pou pi piti 16 sitwayen bandi nan gwoup Karavann yo te touye. Daprè enfòmasyon disponib yo moun sa yo mouri se akoz yo pa t gen pyès sou yo nan moman gang yo t ap kesyone yo sou konn rezon prezans yo nan komin nan.
Atik sa se pwopriyete prive ©️ Gwoup Medya MAGHAITI 2024
