Nan yon entèvyou jounen jodi jedi 18 avril 2024 la, reprezantan manm Enstans suivi pwotokòl 17 Oktòb la, Delson Cius, te bay Mag Haïti, li di gouvènman an plas la pa t janm pran soufrans pèp la oserye.
Jounen jodi nou konstate yon ensekirite tèt chaje k ap vale teren, kote se chak jou pi plis bandi ak zam ap pran tèritwa, se plis vid enstitisyonèl ak konstitisyonèl k ap genyen, sa ki lakoz divès enstitisyon kle oblije fèmen pòtay yo, tankou legliz, lopital, lekòl, inivèsite paka fonksyone nan zòn Metwopolitèn Pòtoprens lan.
«Nivo ensekirite, nivo vid enstitisyonèl ak konstitisyonèl se sitiyasyon ki kontribye an gwo nan enstabilite politik kwonik nou genyen la. Kote pèp la nan sitiyasyon l ap viv trè mal. Akoz bandi ak zam pran kontwòl prèske tout espas», se sa a Delson Cius fè konprann.
Reprezantan enstans suivi pwotokòl la te kontinye pou li ajoute :«Gouvènman an te toujou manifeste mepri li, li te toujou montre li pa gen volonte pou l abòde pwoblèm ki la yo.»
Rejim 3èm vèsyon an montre enkonpetans li, kote yon dividal moun oblije ap kouri kite kay yo pou bandi ak zam, zak vyòl, dechoukay, boule kay pa sispann fèt nan kè kapital la ak kèk pwovens nan peyi a, se plis moun nan klas mwayèn ki viktim zak sa yo. Se veritab konsta reprezantan pati politik sa a : «Nan sitiyasyon kriz miltidimansyonèl sa a, rezolisyon kriz la dwe pase dabò nan rezoud dimansyon kriz politik la. Li klè nou pa gen referans legal ni konstitisyon pou kriz atipik sa a, puiske nou pa nan yon vakans prezidansyèl. Kidonk, nou dwe pase atravè yon dinamik politik pou n rezoud li».
Poutan, nou gen yon gouvènman demisyonè k ap prepare l pou li pase lamayòt la bay yon Akò politik epi sosyete sivil la sou chapo yon konsèy prezidansyèl Tranzisyon (KPT). Sa a ta dwe penmèt sosyete a sòti tèt li nan kriz ensekirite a epi òganize eleksyon lib ak demokratik.
Pou Delson Cius : «Akò politik ki jwenn nan mitan aktè yo li gen yon seri priyorite, pami yo se sekirite a. Yo prevwa òganize yon konsèy Nasyonal sekirite pou ki reflechi sou estrateji nan nivo pi wo yo, nan nivo teknik ak operasyonèl se pral Lapolis ak lame ki pral okipe sa a.»
Sou lòtbò, divès militan ak òganizasyon politik konteste desizyon ki ta fè kwè se nan mitan konsèy prezidansyèl Tranzisyon ak aktè ki te siyen Akò anvan yo k ap gen pou fòme kabinè ministeryèl la.
«Nan demokrasi nou p ap janm ka jwenn yon konsansis tout moun mete yo dakò yo sou tout bagay. Men, nou bezwen yon konsansis ki gen reprezantatif.», se sa a politològ Delson Cius Kontinye pou l di.
Pou fini, konsèy prezidansyèl Tranzisyon an kontrèman avèk sa a moun yo ap di pral gen yon bidjè ki la pou li. Se pral bidjè sa a ki pral sèvi li bidjè fonksyonman li. Nou rete kwè k ap gen pou li pran ankont bidjè aktyèlman la, avwe Delson Cius.
© Tous droits réservés – Groupe Média MAGHAITI 2024
