Prèske 2 semèn aprè plizyè ajan imigrasyon dominiken te fè kadejak sou yon ti fi ayisyen 14 lane, prezidan yo a, Luis Abinader pwomèt jistis ap fèt nan dosye sa a. Se pou sa a selon N Digital, li deklare kèlkeswa nasyonalite timoun nan te ye a se yon aksyon kriminèl ki pa t dwe janm fèt.
«Lalwa ap aplike kont moun ki responsab zak sa s, kèlkeswa moun li ta ye a epi plas moun nan ta okipe a», se deklarasyon prezidan dominiken an jounal la ekri pandan yo di tou li te pwofite kalifye zak sa a kòm yon aksyon kriminèl e yon gwo wont pou sosyete yo a, puiske daprè li se yon abi moun pa menm ka dekri.
Malgre tout pwomès gouvènman dominiken an ak Direksyon Jeneral Migrasyon (DGM) an, jouskaprezan responsab yo fè konprann yo poko gen idantite moun ki te fè kadejak sa a. «Nou te bay pakè Igwe (Higuey) a non tout moun ki te nan entèvansyon sa a. Nou toujou poko ka di si se yon ajan imigrasyon oubyen yon lòt moun», daprè sa Listín Diario rapòte se deklarasyon sa a direktè DGM nan, Venancio Alcantara, te fè.
Yon lòt kote medya a soulinye, Venancio fè konnen viktim nan te deklare yo li kapab idantifye ajan ki te fè zak la si tout fwa yo ta nan menm espas.
N ap soulinye, ajan imigrasyon dominiken yo te vyole Ayisyèn 14 lane sa lakay li menm nan vil Altagracia, vandredi ki te 5 avril 2024 la. Anplis, daprè jounal dominiken yo viktim nan ak tout fanmi l resevwa gwo menas sou lavi yo plizyè fwa. Sa a pase avan epi aprè yo t al depoze plent pou denonse aksyon an nan lapolis.
Atik sa se pwopriyete prive ©️ Gwoup Medya MAGHAITI 2024
