Nan kad dosye 26 zam fòs lòd yo te sezi nan pò Okap la, Responsab yo nan lapolis la anonse, ayè samdi 13 avril 2024 la, yo rive arete sipèvizè dwàn Okap la. Pandan arestasyon sa a, lapolis la fè konnen yo sezi 482 000 goud plis yon machin nan men endividi a.
«Samdi sa anketè BLTS k ap travay nan Nò a arete sitwayen yo rele Jean Bernard Joseph pou konplisite l nan trafik ilegal entènasyonal zam ak bal, li se chèf sèvis epi sipèvizè nan dwàn», selon enfòmasyon Polis Nasyonal Ayiti (PNH) a pataje sou kont fesbouk yo. Yo fè konprann arestasyon sitwayen an vini aprè komisè gouvènman Okap la, Charles Edouard Duran te mete manda dèyè l vandredi ki te 12 avril pase a.
Pandan tan sa a, lapolis presize nan moman operasyon sa a, yo sezi nan men Jean Bernard Joseph yon machin «Land Rover» blanch. Alòske yo di yo jwenn sou li tou, 482 000 goud ak 40 dola vèt. Nan sans sa fòk nou di, Kòdinasyon Près lapolis la pa bay okenn detay pou ta konnen si endividi yo arete a se ta moun yo te prezante sou non «Barthol» la.
N ap soulinye nan dosye sa a ajan Polis Nasyonal Ayiti(PNH) yo te sezi 26 zam, 999 bal ak 34 chajè nan pò Okap la jou ki te vandredi 5 avril 2024 la. Si n kwè manda chèf yo te mete deyò yo, pou kounye a ta rete pou yo arete Wilmane Jean ki se komisyonè nan dwàn.
Atik sa se pwopriyete prive ©️ Gwoup Medya MAGHAITI 2024
