Nan yon kominike ki sòti jodi samdi 13 avril 2024 la, Sekretè Jeneral Nasyonzini an, Antonio Gutteres felisite nouvo pa ki bay Konsèy Prezidansyèl Tranzisyon an (KPT) lejitimite l an Ayiti. Nan sans sa a, diplomat la konseye tout sektè ayisyen yo pou kontinye ak pwosesis sa a k ap mete gouvènman tranzisyon an nan tèt peyi a.
«Li mande pou tout pati yo kontinye pouswiv demach pou mete gouvènman tranzisyon sa a, sa a k ap tou enplike nominasyon, nan bon tan an, yon premye minis e yon gouvènman pa enterim, pou nominasyon manm Konsèy Elektoral Pwovizwa a tou», selon deklarasyon gwo responsab Nasyonzini an.
Yon lòt kote, prezidan peyi Kenya a, William Ruto bò kote pa l salye dezisyon sa a tou. Pou li, se yon mwayen k ap pèmèt vyolans la kaba epi tabli yon gouvènman demokratik an Ayiti. Nan deklarasyon l fè sou kont X li jodi samdi a, chèf leta a fè kwè peyi l la toujou prè pou l ede peyi a sitou nan koze deplwaman polisye li yo.
Kon sa a tou, menm jan kominote Karayib la (CARICOM) te di li apwouve atik 16 dokiman an ki pale sou misyon konsèy la, Antonio Gutteres li menm tou peze sou kolaborasyon ki dwe genyen ant manm KPT a ak kominote entènasyonal la. Se pou sa a tou, li pwofite raple tout eta manm Nasyonzini yo, yo dwe kontribye pou Misyon Miltinasyonal Èd pou Sekirite a (MMAS) kapab vini sou teritwa ayisyen an.
Atik sa se pwopriyete prive ©️ Gwoup Medya MAGHAITI 2024
