Kèk tan aprè jounal Listín Diario revele gen yon ti fi ayisyen 14 lane ajan imigrasyon dominiken te vyole vandredi ki te 5 avril pase a, responsab diplomatik ayisyen yo nan peyi a kondane zak la jodi samedi 13 avril 2024 la. Nan kominike yo sòti atravè Ministè kominikasyon an, yo egzije pou otorite dominikèn yo pèmèt viktim nan jwenn jistis li fas ak otè zak vyòl sa a.
«Chanseleri ayisyèn nan kondane aksyon sa a ki atake diyite moun epi egzije pou viktim nan jwenn jistis li», daprè sa a ki di nan kominike sa a. Nan menm sans la, responsab ayisyen yo presize nan moman krim sa fèt la ajan imigrasyon yo te chwazi pwofite absans paran timoun nan pou te kapab vyole l.
«Yo pran pretèks yo t ap mete kontwòl sou dokiman e tou pwofite kòm paran timoun nan pa t la, ajan yo antre nan kay la pa fòs pou te komèt krim nan», toujou selon sa yo soulinye.
Pandan tan sa a, yo fè konnen konsila ki nan zòn Igwe a deja tabli kontak ak paran viktim nan. E tou, yo anonse reprezantan diplomatik ayisyen yo ki Repiblik Dominikèn gen lòd pou bay viktim nan ak tout paran l asistans y ap gen bezwen.
N ap raple n, Listín Diario te fè konprann deja gen gwo ankèt ministè piblik nan zòn Vewon (Altagracia) nan tèt kole ak responsab yo nan Direksyon Jeneral Migrasyon (DGM) ap mennen pou fè limyè nan dosye sa a. Pwokirè vil la, Rocío García te menm anonse viktim nan sou pwoteksyon yo depi jedi 11 avril ki sot pase a.
Atik sa se pwopriyete prive ©️ Gwoup Medya MAGHAITI 2024
