Kèk tan aprè gouvènman an pibliye dekrè ki bay Konsèy Prezidansyèl Tranzisyon an (KPT) libète pou dirije tranzisyon an nan tèt peyi a, kominote Karayib la (CARICOM) reyaji pou felisite dekrè sa ki pran an. Se pou sa yo fè konnen yo menm bò kote yo, yo dakò ak akò politik ki presize misyon konsèy la ap gen pou l akonpli yo.
«Chèf gouvènman kominote Karayib la felisite nouvèl jodi a pa rapò ak piblikasyon dekrè pou kreyasyon Konsèy Prezidansyèl tranzisyon an. Kreyasyon Konsèy 9 manm nan mòd politik laj ak enklizif la bay siy pou posiblite ki genyen pou gen yon nouvo chimen pou Ayiti» , selon sa yo fè konnen jodi vandredi 12 avril la.
Yon lòt kote, pa rapò ak dokiman ki pote non «Akò Politik pou yon tranzisyon pasifik epi nan lòd» , manm Konsèy la te pibliye nan jou pase yo , CARICOM di li apwouve atik 16 la ladan l. Atik sa di: «Misyon Konsèy Prezidansyèl la se pou remete Ayiti nan wout diyite, lejitimite demokratik, estabilite epi asire bon fonksyonman enstitisyon leta yo» .
Pou kounye a, si n kwè sa yo te di yo, pwoblèm sekirite a se premye bagay Konsèy Prezidansyèl Tranzisyon an ta dwe manyen aprè enstalasyon yo. Nan sans sa a, chèf kominote Karayib la, ki te rive fè aktè ayisyen yo chita ansanm, pwomèt malgre tout difikilte yo y ap kontinye ede pèp ayisyen an.
N ap raple, manm Konsèy la te anonse y ap kòmanse travay sou eleksyon k ta dwe genyen nan peyi a depi nan 3 premye mwa enstalasyon yo. Yo fè kwè, y ap nonmen yon Konsèy Elektoral Pwovizwa (KEP) ak 9 manm, e moun sa yo ap sòti nan divès sektè nan peyi a.
Atik sa se pwopriyete prive ©️ Gwoup Medya MAGHAITI 2024
