Nan yon atik Listín Diario pibliye jodi vandredi 12 avril 2024 la, yo fè konnen plizyè ajan, k ap travay nan imigrasyon Repiblik Dominikèn, vyole yon ayisyèn ki gen 14 lane. Selon jounal la, se yon zak vyolans seksyèl ki fèt vandredi pase a nan zòn Punta Cana .
«Selon akizasyon ki fèt nan pakè inite Jan Bavawo a, ti fi 14 lane sa a se plizyè ajan nan Direksyon Jeneral Migrasyon an(DGM) ki te vyole l» , se sa jounal la di pandan yo fè konprann gen plent ki depoze kont moun ki fè zak sa a sou resòtisan ayisyen an. N ap presize ti fi a te lakay li poukont li jou aksyon an te pase a.
Anplis vyòl viktim nan sibi, medya a fè konnen otè zak yo menase plizyè fwa pou touye l ak tout fanmi l, si yo denonse aksyon an.
«Li rapòte aprè sa a ajan yo te mennen tifi a nan sant imigrasyon rejyon an kote yo te menase l pou touye l. Li eksplike tou, akòz plent la ki depoze kont yo nan biwo pwokirè rejyon an, ajan yo t al lakay ti fi a epi menase l yon lòt fwa pou touye l ak tout paran l», sa se deklarasyon Santiago Molina, jounal dominiken an rapòte. Li enpòtan pou n raple Molina se yon manm nan Komisyon Dwa Moun k ap travay sou dosye a.
Fas ak akizasyon sa ki peze sou do ajan sa yo, Listín Diario fè konprann gen gwo ankèt ministè piblik nan zòn Vewon (Altagrasya) nan tèt kole ak responsab yo nan DGM ap fè sou dosye sa a. Se pou sa a, pwokirè vil la, Rocío García, anonse depi ayè jedi a viktim nan sou pwoteksyon yo.
Pou kounye a, selon direktè imigrasyon dominiken an, Venancio Alcántara, si ankèt yo ta revele youn nan ajan sa yo ta enplike tout bon nan dosye sa a y ap revoke yo pou yo ka al reponn kesyon lajistis.
Atik sa se pwopriyete prive ©️ Gwoup Medya MAGHAITI 2023
