Aprè nòt Biwo Suivi Akò Montana ak fanmi Lavalas la te sòti nan dat 25 mas ki sot pase a pou mande defini mòd operatwa Konsèy prezidansyèl la, ayè mèkredi 27 mas 2024 la, manm yo KP a finalize yon dokiman sou òganizasyon ak mòd operasyon li yo. Ladan l gen yon akò piblik transparan ant sektè ki enplike nan pwosesis la.
“Konsèy prezidansyèl la detèmine pou soulaje soufrans pèp Ayisyen an ki pran nan nas move gouvènman, vyolans tout kalte, mepri sou aspirasyon li ak bezwen li yo”, daprè sa yo fè konnen atravè kominike konsèy prezidansyèl la mete deyò.
Pandan sitiyasyon difisil peyi a ap ogmante parapò avèk piyaj epi dife nan byen malere yo, konsèy prezidansyèl la li menm konsidere aksyon yo kòm altènativ ap vin pote yon ansanm repons avèk pwoblèm sa yo.
“Nan tèt ansanm konsèy prezidansyèl la ap egzekite yon plan pou restore lòd piblik ak demokratik atravè retablisman sekirite vi ak byen popilasyon an, soulaje mizè li, reyalize eleksyon lib ak tout lòt refòm nesesè pou pwogrè Nasyon an“, pou ajoute KPT nan kominike tou louvri sa.
Manm yo kontinye pou li enfòme popilasyon an, dyaspora ayisyen an an kominote entènasyonal la sou preparasyon li deja fè pou l rantre an fonksyon ofisyèlman. Pandanstan, nou pwofite raple divèjans nan moman pou yo te òganize eleksyon nan tèt konsèy prezidansyèl lan nan chwa prezidan konsèy sila, kote kèk aktè te mande repòte li nan 3 jou pito.
“Peyi a nan yon kalfou enpòtan ki mande inite. Se yon obligasyon pou nou tout mete tèt ansanm pou rezoud kriz la epi pou n rive tabli byennèt tout moun epi yon pi bon avni pou peyi nou an”, pou fini nan kominike sila.
© Tous droits réservés – Groupe Média MAGHAITI 2024
